Gahi gyud kumbinsehon

Dako gihapon nga hagit sa kagamhanan ang pagkumbinser sa mga tawo nga magpabakuna batok sa COVID-19.

Gani sa Central Visayas, wala pa sa katunga ang nabakunahan nga mga frontliners diin nakatala lang og 39.2% base sa accomplishment report sa Department of Health sa Rehiyon 7 ang vaccine rollout program.

21,441 lang sa 54,000 nga nakalista nga mga health frontliners ang nabakunahan nga layo pa sa tinood.

Moabot sa 58 ka hospital ug ubang  healthcare facilities sa rehiyon ang nakadawat sa  COVID-19 vaccines alang sa ilang mga frontline workers. Apan 24 lang ang  nakakompleto inoculation schedules sa unang dose sa Sinovac vaccines.

Sa mga health frontliners pa lang ni nga kining grupoha lapad kaayo og pagsabot kay mao man ang ilang kalibotan, nganong gahi man sila pasabton?

Seguro kay naa silay nasayran nga dili makaayo ang bakuna pero sila ang mas labaw nga nasayod sa kaluwasan nga mahatag niini.

Kong sakaon kaayo ang pagkumbinser sa  uban nga frontliners mas subadahon unya kaayo sa mga tawo nga walay kabangkaagan sa medisina.

Nagsige naman og pamakuna ug wala may nangadaut nganong magpalugit pa man ang uban? Dili malikayan ang kahadlok pero mas makahadlok kong mataptan sa virus nga wala kay gihimo nga panagang.

Naa naman gyud kining vaccine gamiton nalang nato batok niining kontra nga dili makita, ilabi na sa mga frontliners nga kanunay makig atubang sa virus kada adlaw.

Hinaut nga inig abot sa mga dili mga frontliners ang uban dili na magduhaduha nga magpabakuna apan ikonsulta una sa doktor ang kondisyon sa ilang lawas aron segurado.

First dose pa lang gani wala pa man nakasulbong pagmaayo ang vaccine rollout, maabtan nalang sa sedond dose schedule mosamot kalangay.