Gustong itransfer sa ilang pangan ang nasunod nga yuta

Dear Atty. Divine,

Usa ko sa tigbasahan sa imong column. Naa koy problema bahin sa yuta. Lima kaming managsuon nga heirs sa yuta nga namana sa amo mama sa ilang ginikanan. Bali ang title ini pangalan pa sa among apohan,  niadtong 2019 lang napabuak sa tulo ka bahin  ang yuta kay tulo ra ka managsuon ako ginikanan. Ang usa nila ka igsuon nga akong Tiyo buhi pa atol sa pagbahin sa property apan human sa pipila ka buwan  gikan sa pagbahin  namatay kini.  Busa ang tulo ka original heirs apil na ang among ginikanan patay na tanan . Ang akong pangutana, unsaon namo pagbalhin sa title sa among nasunod sa yuta, kay lima baya kami managsoon sa side sa akong ginikanan ug gusto nako nga makuha sab ang akong share ug mabalhin sa akong name. Unsay mga lakang nga angay nakong buhaton para ma tituluhan ang akong share. Hinaut nga mahatagan ug tubag ang akong pangutana. Daghang salamat ug Good Bless you. —Crisanto

Dear Crisanto,

Kun ang tulo ka original heirs patay na, ang mga anak sa tulo mao nay morepresentar sa pagbinahinay. Busa sa share sa imong mama, kamong lima ang magbahin in equal share. Sa side sad sa mga igsuon sa imong mama, ang ilang mga anak mao sad ang magbahin. Ang una ninyong buhaton mao ang pag-execute og Extrajudicial Partition nga pirmahan sa tanang mga heirs. Kun na divide na og katulo ang property, ang side sa imong mama inyo sad nga ipa-divide og kalima og ipa approve sa DENR ang subdivision plan. Ang inyong Extrajudicial Partition kinahanglan nga notarized ug human niini inyong i-submit sa BIR alang sa pagbayad sa estate tax . Mas maayo nga mokuha mo sa BIR sa list of requirements alang sa pagpa-compute og pagbayad sa estate tax. Kun mahuman mo og bayad niini ug mogawas na ang Certificate Authorizing Registration or CAR inyong isunod ang pag-process sa transfer sa tax declaration ug sa Title. Aron matitulohan ang inyong individual nga share, ini’g process ninyo sa title inyong i-apil sa pag-submit sa Register of Deeds or RD ang approve subdivision plan. Ang  Register of Deeds naa sad na silay list of requirements nga dapat ninyong i-comply alang sa pag issue og title sa inyong tagsatagsa nga pangan. Thanks and God Bless. —Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.