_banat
^

Banat Opinyon

Hagdanan paingon sa langit

JAV BANATI - Javier Yntig Tapulado - Banat

Kuwaresma. 40 ka adlawng miestar si Hesus sa kuyaw’ng deserto aron magpuasa’g mag-ampo alang sa katumanan sa gisugo sa Iyang Amahan – ang pagluwas natong tanang makasasala pinaagi sa paghalad sa iyang kinabuhi itaas sa krus.

Dili mapuy-ag dugay og tawo ang maong dapit. Daghang bangis mananap. May mga tanga (scorpions). Subra kainit kon adlaw. Sa gabii, grabe kabugnaw. Unya, walay tubig ug makaon.

Human sa 40 ka adlaw ug gabiing walay inom-inom ug kaonkaon, naluya Iyang lawas sa tumang kagutom.

Gipahimuslan sa yawa ang mao Niyang kahimtang. Giduol dayon si Hesus ug miingon: “Kon anak ka sa Diyos, mandoi kining mga batoha nga mahimong pan.” Apan si Hesus mitubag: “Ang kasulatan nag-ingon: dili sa pan lamang mabuhi ang tawo. Kondili, sa tanang pulong sa Diyos.” (Mateo 4:3-4)

Luyo sa nagkutoy’ng tiyan, diin sa usa lamang ka pagpamilok, mahimo ra unta Niyang usbon ang bato ngadto sa pan, wala gyod si Hesus magpadala sa hagit-tental sa yawa.

Imbes gamiton Iyang gahom, maoy gipalabi Niya ang pagpaubos pinaagi sa pagpahinumdom sa yawa, nga ang tawo dili mabuhi sa pagkaon nga iyaha lamang sa lawas. Kondili, sa mga pagkaong makabusog sa espiritu ug kalag, nga mao ang pagsunod sa mga pulong sa Diyos.

Ning makalilisang pandemiya nga atong giatubang karon, unya kuwaresma pa gayod, diin gikutaw sa COVID-19 ang utok sa katawhan sa nagkalainlaing suliran, nga usahay mosangpot sa pagpangawat, pagpinatyanay ug paghikog tungod sa kagutom, gitudloan kita sa Ginoo nga dili magpatental sa mga malinglahong sugyot sa yawa.

Iyang giklaro, nga bisag busgon pa sa demonyo sa pan o sa tanang lami nga gikinahanglan ang lawas sa tawo, mamatay gihapon kini. Apan kon ang mga pulong sa Diyos maoy atong kan-on, dili lang ang espiritu nato ang mabusog, kondili, lakip atong lawas.

Timan-i. Ang himsog-limpiyong espiritu lamang ang makasulod sa Iyang gingharian. Ang tawo gikan sa abo, sa abo pod siya mobalik.

Maong kada Ash Wednesday, unang adlaw pagbukas sa kuwaresma, gisangyaw sa kaparian unsay tinuorayng kahulogan sa ‘ASH’: Ampo, Sakripisyo, Hatag!

Tulo lamang kini ka ang-ang (steps) sa hagdanan nga dapat maoy atong pandayon panahon sa kuwaresma. Hagdanan nga mohatod kanato paingon sa langit.

HESUS
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with