500 years of Christianity

All people were baptized and built the Church of Christ and that’s the beginning of our Catholic Life.  (Yoyoy Villame)

Karong adlawa gisaulog nato agi’g paghandum sa lima ka mga siglos a mga katuigan sa atong pagka-Kristiyano. Gani dinhi sa Silangang Asya nangangkon man kita nga kita ang duyan sa Kristiyanismo.

Apan ang mga pangutana padayong mitukbil sa tagsatagsa nato ka mga kasingkasing ug salabotan. Kini naglangkob ning mosunod:

1.   Nakatuhop ba gyud kaha sa atong salabotan ang hustong pagsabot sa atong gituohan? Matud pa kun dunay orthodoxy dunay ortho praxis kun dunay hustong pagtulon-an, natural dunay hunstong binuhatan nga resultado gikan niini.

2.   Basin baya kun padayon pa kitang nahilansang sa auto-belief sa napapas nga grandeur sa nabag-as nga kagahapon? Ug malisud ang pag move on sa buhing kamatuoran nga karon diay’ng mga panahona daghang mga kapilian.

3. Mahinungdanon kaayo ang ritwal apan dili kini sa tanang mga higayon nga maoy sukaranan nga nihamtong na kita.

Dunay mga higayon nga kinahanglan kitang mohimo og mga konkretong mga lakang sa atong kinabuhi sa pagtuo kay matud pa ni Santiago nga ang pagtuo nga walay buhat patay man nga pagtuo.

4. Isip simbahan sa unsang paagi man kita nahimong mas konkretong timaan sa gugma ngadto sa uban.

5. Labaw sa tanan, nisalamin ba kita sa kang Kristong pagtulon-an nga maoy sukaranan sa tanang paningkamot nato?

Hinuon dili man gyud hingpit ang tanan. Sama sa uban kita naningkamot nga mamahimong tiunay sa bisan unsa nga atong mga panlantaw.

Saksi man gyud ang Dios niini tingali ug sayud sab siya nga sa atong tinguha sa kinabuhing balaan sa makadaghan usab kita nahitumpawak.