EDITORYAL - Kinahanglan gyung magpabakuna

Proteksyoni ang kaugalingon ug ang mga minahal sa kinabuhi gikan sa coronavirus disease nga naghamok karon sa kalibotan sukad pa sa miaging tuig kun tinuod nimo silang gipangga.

Walay laing pamaagi paghimo niini mao lamang gyud ang pagsunod sa mga health protocols nga gimando sa gobiyerno ug labaw sa tanan ang pagpabakuna batok sa Covid-19.

Samtang tuod og naa sa pa third clinical trial kining mga bakunang gipanggamit karon batok sa Covid-19, duna namay mga nasud nga nakauna na sa pagpamakuna ang nihatag og assessment sa kaepektibo sa tagsatagsa ka bakunang ilang nasuwayan.

Pinaagi sa ilang mga komento bahin sa mga bakuna mahatagan og giya ang ubang kanasuran ug bisan sa mga lokal nga kagamhanan ug pribadong mga kompanyang may kwartang ikapalit kun unsa nga matang sa bakuna ilang paliton.

Makapili na ang tanan sa labing maayo para kanila, apan kalakip niini ang gastos tungod kay sa umaabot nga panahon dili na kini libre ang bakuna.

Busa importante kaayo nga gawas sa pagsunod sa minimum health protocols sa mga tawo sa tanang oras, kinahanglan gyud silang magpabakuna karon.

Mentras libre pa ilabi kadtong gikan sa gobiyerno, bahala pa og kun asa nga nasud kini gikan o unsa nga brand.

Samtang tuod dunay brands nga kadudahan ang kaepektibo, sama nalang sa Sinovac gikan sa China nga kapin 50 porsiyento ra ang kaepektibo (base sa assessment gikan sa Brazil ug Indonesia) wala kini magpasabot nga wala na kini pulos.

Panawagan karon sa gobiyerno ngadto sa katawhan nga kun tawgon na gani alang sa pagpabakuna, kinahanglang mosanong gyud aron makasugod na tanan sa “new normal.”