Templo

Marso 7, 2021: Ikatulong Domingo sa Kwaresma

Mga Pagbasa: Ex. 20;1-17/Sal. 19/1 Cor. 1;22-25/Jn. 2;13-25

Ang templo mahinungdanon kaayo alang sa mga Judiyo. Una, tungod kay kini man ang sentro sa ilang relihiyosong mga kalihukan.

Ikaduha, sentro usab kini sa ilang patigayon. Ginaingon nga dunay tulo ka mga templo nga natukod diha sa kasaysayan.

Ang unang templo gitawag to og Temple of Solomon tungod kay tinukod man kini sa maong hari.

Nindot kini nga templo apan naggun-ob panahon sa Babylonian Invasion. Gisundan kini sa Temple of Zorobabel nga natukod human papaulia ni Cyrus the Great sa Persia ang mga Israelita balik sa Jerusalem.

Sunod mao ang Temple of Herod nga tinukod ni Herod the Great.

Tumong niini mao ang paghatag og igong kalipay sa mga Judiyo ug aron dawaton siya ingon nga ilang hari apan daghanan gihapon sa mga Judio ang nagdumili. Hinuon naggun-ob gihapon ang  maong templo sa dihang nisulong ang mga Romanhon.

Ang nahabilin na lang niini mao ang wailing wall nga maoy adtoon sa mga pilgrims matag karon ug unya.

Sanglit ang templo sentro man sa ekonomikanhong kalihokan, daghan sa mga kinahanglanon ang atua na didto. Ang mga mananap nga gamiton sa mga halad sunogon. Ang mga mangilisay og kwarta kay ang currency that time mao man ang denarius sa Roma nga kinahanglang ilisan og sheckel nga mao ang temple currency.

Dili supak si Jesus niini sanglit mao naman ni ang naandan apan ang abuso maoy nakapapungot niya. Nag-wild siya didto sa sulod nga maoy hinungdan sa taliabot niyang pag-antos sanglit daghan man ang naglagot sa iyang gibuhat. Ang balay alampoanan nahimo naman nuong tagoanan sa mga tulisan.

Ning panahon sa dakong pandemiya daghan sa mga balay alampoanan ang nasirad-an. Apan ang matag usa padayong nagpangita sa presenisya sa Dios bisan asa.

Kini tungod kay haw-ang ang kinabuhi, haw-ang ang palibot. Haw-ang tungod kay ang panghitabo karon maoy nibabag sa kadaghanan sa pagsinati sa presensiya sa Dios.

Apan ang presensiya wala lang sa mga balay alampoanan kondili anaa gyud mismo sa tagsa tagsa nato ka mga kasingkasing. Kana bang bisan wala ka magluhod ikaw sa gihapon nag-ampo.