EDITORYAL - Generic o branded nga mentalidad
Karong duna nay bakuna, masugdan na ang pagpamakuna sa gobiyerno sa nagkadaiyang mga rehiyon. Apan daghan sa mga tawo ang dili kaayo interesadong magpabakuna niining Sinovac gikan sa China.
Alang sa publiko, ang Sinovac mora lamang og “generic medicine. “ Sa laktod, baratuhon ra kun itandi sa mga “branded” nga tambal. Kini nga mentalidad dili gyud mawala sa katawhan tungod kay tanan nakasinati man gyud og kalainan sa mga generic ug branded nga tambal.
Apan alang sa kasayoran sa tanan, wa pay generic o branded nga bakuna batok COVID-19 karon. Kini tanang mga bakunang gamiton pulos pa ni ubos sa clinical trials.
Ang clinical trial gisugdan sa pipila lang ka boluntaryo, sunod dul-an usa ka gatos dayon ang third and final clinical phase mao na kini karon, pagtesting niini sa mas lapad nga populasyon.
Mao bitaw ang unang batch sa bakuna sugod pa sa bulan sa Disyembre hangtud karon pulos pa donasyon, aron daghan ang matestingan kun epektibo ba o dili.
Way gobiyernong mopalit og bakuna nga dili pa sigurado apan unsaon man pagkasayod kun epektibo kun dili kini suwayan ngadto sa mas daghang tawo?
Niining bahina na mitabang ang World Health Organization sa mga pharmaceutical companies. Nangabugay sila nga kining maong mga kompanyaha kasaligan ug angayan hatagan og higayon nga matestingan ilang mga bakuna. Sigurista usab kining mga kompanyaha kay hadlok sila og mga legal nga obligasyon kun simbako og dunay dili maayong side effects ang ilang bakuna. Mao nga gusto nilang ang mga nasud maoy mohangyo kanila nga makakuha og bakuna.
Pinaagi sa Food and Drugs Administration (FDA) sa Pilipinas miisyu kini og Emergency Use Authorization sa maong mga bakuna apan kinahanglang ang ilang kompanya maoy mo-aplay niini bugti sab nga wala silay tulubagon kun magkinaunsa.
Ning bag-ohay lang, gipirmahan ni Pres. Duterte ang Indemnification Law diin ang gobiyerno maoy moabaga sa gastos sa mga tawong mabakunahan unya dunay dili maayong epekto kanila ang COVID-19 vaccine.
Tungod kay pandemiya way kapilian ang mga gobiyerno kondili ang pagkooperar sa WHO ug aning mga pharmaceutical companies.
- Latest