Kalayo ug COVID-19 and kontra

Marso na, giobserbar niining buwana ang fire prevention month diin nabatyagan na ang tumang kainit sa panahon ug sagad masinati ang sunog sa bisan asa.

Niadtong unang adlaw sa Marso gibuksan sa Bureau of Fire Protection Region-7 ang kalihokan apan sukwahi sa nangaging katuigan mingaw ug yano ra, ang dakbayan sa Sugbo walay kisaw bisan pagpatingog nalang sa mga bombero.

Gituyo kini isip pagsagop sa kabag-ohan karon gumikan sa COVID-19 pandemic aron dili ma expose ang mag bombero ug ang katilingban sa posibleng covid transmission.

Hinuon bisan og nakasinati og pagsuway apan gipasalig sa BFP wala mahunong ang ilang serbisyo diin naglakip sa awareness campaign sa katawhan sa paglikay sa sunog.

Aron pagtuman sa health protocol wala lang una mosum-ok ang mga bombero sa kabalayan.

Apan padayon ang ilang recorida aron dili mataligam-an sa katawhan ang trahedya nga mahitabo kong magdanghag sila sa mga buhaton.

Sa fire incident report sa BFP-7 mikunhod ang nahitabong sunog sa buwan sa Enero ug Pebrero itandi sa susamang period sa nakalabayng tuig, klaro ang hinungdan niini nga mao ang pandemic pero sa good side nga epekto.

Tungod kay ang mga tawo anaa ra man kanunay sa balay human gipatuman ang estriktong protocol, mabantayan gyud nila ang mga panghitabo ug duna may mahitabong sunog dali ra usab mapayong dili sama sa una nga walay tawo ang mga balay kay tua sa gawas. Ang resulta inig uli nila naabo na ang pinoy-anan.

Pahimangno sa mga bombero sa katawhan bisan kapila nila balikbalika, mag-amping gyud aron mapanalipdan ang dili lang ang mga kabtangan kon dili ang kinabuhi.

Admitido ang BFP-7 nga gawas sa sunog, kaaway usab nila ang virus. Gani naay mga personnel nila nga nataptan sa balatian apan wala kini makaapekto sa ilang responsibilidad pagpanalipod sa katawhan.

Adunay mga bombero o bombera nga gihimong contact tracer sa virus nga usa sa ilang responsibilidad niining panahona nga dakong natampo sa COVID-19 containment.

Samtang sa mga tawo angayan mahinumduman nga ang atong kaluwasan naa ra gyud kanato ma sunog man o pandemic, kita ang number one nga manalipod sa atong kaugalingon.