Sell bust or buy bust

Dili kumbinsido si Surigao Del Norte Representative Robert Ace Barbers sa pangangkon sa Philippine National Police (PNP) ug Philippine Drug Enforcement Agency (PDEA) nga lehitimo ang ilang operasyon nga miresulta sa pagkamatay sa duha ka mga polis ug usa ka PDEA agent.

Si Kongresista Barbers kinsa mao ang Chairman sa House Committee on Dangerous miingon nga ang pangangkon sa PNP ug PDEA nga lihitimo ang ilang operasyon usa ka dakong pangutana kana tungod kay kon lehitimo pa kini nganong miresulta man kini sa panag-enkuwentro sa duha ka enforcement agency nga pulos gitahasan sa paglutos sa mga nagpayuhot sa ginadili nga drugas.

Kun lehitimo pa ang ilang operasyon, aduna unta kini koordinasyon tali sa duha basi sa Section 86 sa Akta Republika 9165 nga nag-ingon nga sa dili pa ipatuman ang usa ka lehitimo nga anti-drug operation gikinahanglan nga duna kini koordinasyon.

Kun ang taho sa medya ang basihan, ang PDEA mura og mihimo kini og usa ka sell bust nga operation ug kun mao man ugaling kini, wala kini gitugot sa balaud tungod kay nagasubay kini sa gitawag og instigation.

Unsa man diay ang “sell bust” kun imo ikomparar sa “buy bust”? Sa “sell bust,” sa tinamban nato nga pagsabot, ang polis mobaligya og gidili nga drugas ngadto sa ilang target ug kon mopalit na ila kining dakpon. Dugay na kini nga gihimo sa mga polis tungod sa ilang frustration tungod sa  kaabtik sa ilang dakponon. 

Apan wala kini gitugot sa balaud tungod kay gihulagway kini nga instigation. Sa “buy bust,” ang polis mopalit og drugas sa ilang target ug kon makapalit na sila niini, ila dayon kining dakpon. Sa laktod, sa “sell bust,”ang polis mamaligya og drugas sa ilang dakponon samtang sa “buy bust, ang polis mamalit og drugas sa ilang dakponon. Gitugot kini sa balaud. Mao ni ang gitawag og entrapment.

Sa inyong paminaw, sakto kaha si Barbers?