Way kinutoban nga kakuwang
Nagpabiling misteryo sa kampanya sa administrasyon ni Presidente Rodrigo Duterte batok sa COVID-19 ang kakuwang sa inadlaw’ng swab tests. Nga makatabang unta pag-ila sa mga masakiton, pagsubay sa ilang close contacts, pagtambal ug pagbuwag dayon nila sa di pa makapanakod sa mas daghan.
Nasamotan sa nag-usab-usab nga pangangkon sa testing czar nga si Vince Dizon: Niadtong Hunyo nipasigarbo nga 50,000 ka tests nay inadlawng kapasidad sa mga laboratoryo; apan sa niaging semana niangkon nga 30,000 ra diay pero himuon nilang 40,000 tungod sa pagkatap sa bag-ong variants.
* * *
Malili tingaling tinuod kon subayon ang mga numero nga sa Department of Health (DOH) sa inadlaw’ng swab tests sa 225 ka laboratoryo sa tibuok nasud, nga ang katunga (50.2%) pribado ug ang kinabag-an (77.3%) rT PCR ug ang nahibilin (22.7%) cartridge-based PCR.
Kon ipasikad sa uwahing sulti ni Dizon, wa maabot ang kapasidad nga 30,000 ka tests kada adlaw sa niaging semana. Nga lisod ipasabot kay padayon manng nisaka ang bag-ong mga kaso, labi na human sa kasaulogan sa Pasko ug bag-ong tuig.
* * *
24,100 ra ang inadlawng average gidaghanon sa swab tests gikan sa Pebrero 20 ngadto sa 26. Kinaubsan sa niaging Dominggo, Pebrero 21, nga niabot ra og 16,588, o 55.29% sa kapasidad. Kinatas-an sa Pebrero 20, Sabado, nga niabot og 29,084, kuwang og 916 sa target.
Nakapait mao nga way nagtagad nilang Dizon o sa taga DOH sa pagpasabot nganong kuwang ang testing--daot bang mga laboratoryo o gipaburot lang sa DOH ang ilang gidaghanon.
* * *
Sa Sugbo ug Central Visayas, mas dako ang kang-a sa pangangkon ni Dizon ug sa nahitabo: Nipasalig siya og inadlawng kapasidad nga 10,000 ka tests sa 15 ka laboratoryo; apan sa niaging semana, nag-average og 2,829 ka tests kada adlaw, o 28.29% ra sa target.
Kinaubsan niadtong Pebrero 27, Sabado, nga niabot og 1,769 ka tests, o 17.69% ra sa gipasiatab nga kapasidad. Kinatas-an niadtong Pebrero 25, Huwebes, nga niabot og 3,535, o 35.35% ra sa target. Kon di dayon nila mapalambo ang swab testing, gikabalak-an nga magpadayon ang pagsulbong sa bag-ong mga kaso.
* * *
- Latest
