Nagkapuno nang mga ospital
Sa di pa magkalalis ang mga politiko ug mga opisyal sa Department of Health (DOH) sa Central Visayas sa mga numero sa ulohang buhatan sa DOH sa pagsugod na og kapuno sa lokal nga mga ospital sa mga pasyente sa COVID-19, giila ni Health Secretary Francisco Duque III ang rehiyon nga maoy kinatas-an og critical care utilization rate sa tibuok nasud.
Mas taas kay sa ilang gipagawas karong semanaha ang numero nga iyang gitug-an ni Presidente Rodrigo Duterte ug sa gabinete: 48%. Ikaduha ang pinuy-anan sa presidente, ang Davao Region: 47%.
* * *
Giapil sab ni Duque ang Lapu-Lapu City sa listahan sa mga lugar sa kabisay-an, Mindanao ug Luzon nga ang mga ospital hapit na maghuot sa mga pasyente sa Covid-19 kay 69% na ang utilization rate.
Di kalalis ni Duque si Mayor Ahong Chan. Kay sa nangagi nga mga adlaw ang Opon mao ang kanunay nga ikatulo nga kinadaghanan og bag-o nga mga kaso sunod sa Cebu City ug Cebu Province. Ug ang mga ospital sa isla sa Mactan di sama kadaghan ni kadagko sa Cebu City ug Mandaue City.
* * *
Aron di kaayo kuyaw nga paminawon, giusab sa DOH ang ngan nga critical care utilization rate (CCUR) ngadto sa mas mahigalaon sa dunggan nga healthcare utilization rate (HCUR).
Gawas ana, gipaluagan sab nila ang mga lagda sa pag-ila kon luwas pa ba ang utilization rate sa mga ospital: Ang karaan nga ubos sa 30%, aron may kapin pa sa 70% nga kapasidad alang sa mga pasyente nga di Covid-19, gipatas-an nila ngadto sa 60%.
* * *
Ang di nila mausab mao nga nadugangan og 457 ka bag-ong COVID-19 cases sa Sugbo ug Central Visayas niadtong Miyerkules, Pebrero 24, nga ang 212 (46.39%) kinahanglan nga isud sa mga ospital.
Kon ang mga politiko ug lokal nga DOH magsige lang gihapon og pahiyos sa problema, inay hingusgan ang contact tracing ug dugangan ang swab testing, matinuod gyod ang gikahadlokan nga pag-awas na sab sa mga ospital, nga maglinya sab sa gawas sa emergency rooms ang mga ambulansiya nga pulos may naglisod na nga mga pasyente, bisan unsaon pa nila og usab-usab sa mga ngan ug mga lagda.
* * *
- Latest
