Giunhan sa Lalawigan sa Sugbo

Walay nahimong kalapasan ang gipagawas nga Executive Order number 12 ni Governor Gwen Garcia sa pagpaluag sa travel restrictions sa mga tawong mosulod sa lalawigan sa Sugbo ilabi na niadtong mosuroy sa mga maanindot nga talan-awon o mga tourist attractions.

Ubos sa naasoy’ng kamandoan giwagtang na sa gobernador ang pagwagtang sa swab test sa mga domestic travelers isip pagpasayon sa biyahe sa tinguha nga mabuhi pagbalik ang turismo sa lalawigan sa Sugbo.

Kini ang giklaro ni Undersecretary Efimaco Densing sa Department of Interior and Local Government DILG atol sa gipahigayong virtual press con kagahapong adlawa.

Sumala sa DILG official nga ubos sa omnibus guidelines sa pagpatuman sa community quarantine sa nasud, ang mga local government units mamahimong makaisyu og reasonable regulations sa mga travelers, ma-APOR o dili APOR, alang sa interzonal or intrazonal travel, buot pasabot gikan sa managlahing community quarantine classifications.

Gidugang ni Densing nga nahasubay ra ang gihimo sa lalawigan sa Sugbo sa kasamtangang quarantine protocols nga gipatuman sa nasud. Gani mamahimo kining sundogon sa ubang mga local governmnent units.

Sa tigom nga ipahigayon ugmang adlawa sa IATF, tukion ang mga lakang pagpaluag sa restriction aron managsama o uniform ang pagpatuman niini sa mga kagamhanang lokal.

Ang probinsiya sa Sugbo ang labing unang LGU ang mipatuman niining no swab test policy sa domectic travel ubos sa mga kondisyon nga mopakita og medical certificate gikan sa usa ka reputable doctor, pre-booking sa mga hotels ug uban pa.

Apan gusto sa DILG nga dili na i-require ang medical certificate, inay clinical assessment nalang sa adlaw sa paglarga sa travelers ug i-check up na pud sa pag abot sa dapit nga adtoan. Lakip sa gisugyot ang pagwagtang sa travel authority nga naghatag og kasahol sa mga tawo.

Ang tinguha sa lalawigan sa Sugbo sa pagbanhaw sa turismo gidasonan usab sa DILG diin ang turismo nakatampo og dako sa dako nga paglambo sa nasud apan nahagba kini pag abot sa pandemiya.

Bisan pa man sa pagpaluag sa restriction, gihimug-atan gihapon sa gobiyerno ang pag-amping aron dili matakdan sa balatian apan gikinahanglan nga inanay nang molihok ang mga tawo aron manginabuhi ug mabuhi.

Giunhan sa lalawigan sa Sugbo ug sundan pa sa pagpatuman sa ubang mga LGU, dinhing dapita gipakita sa gobernador nga sakto ra ang iyang gihimo.