EDITORYAL - Imbestigasyong way padulngan

Adunay laing opisyal sa administrasyong Duterte ang matud pa imbestigahon sa Department of Health ingon man sa Food and Drugs Administration tungod sa pag-angkon niini nga nagpaturok kini og dili otorisadong bakuna batok sa coronavirus.

Si special envoy to China Mon Tulfo sumala pa miangkon sa iyang lindog nga adtong miaging tuig kauban ang pipila ka opisyales sa gobiyerno, usa nila senador ug mga sakop sa Presidential Security Group, nga nagpabakuna sila og Sinopharm vaccine.

Tungod kay wa pa may pagtugot ang gobiyerno sa mga bakuna nga gamiton batok coronavirus niadtong panahona makonsiderar kadto nga ilegal.

Apan ang iyang depensa gusto ra niyang siguraduhon personal kung epektibo ba gyud ang maong bakuna kay buot niyang mamahimong lokal nga distribyutor niini dinhi sa nasud.

Matud niya nga dili makonsiderar nga may conflict of interest sa iyang gibuhat kay sa pagkatinuod usa lang gihapon siya ka pribadong molupyo bisag special envoy siya sa gobiyerno ngadto sa China. Lain kining husayonon kung adunay mokwestiyon.

Sa pikas bahin, adunay padulngan kaha kining imbestigasyon kuno sa FDA ug DOH?

Komusta diay ang ilang imbestigasyon batok sa PSG nga maoy unang miangkong nagpaturok sa mao gihapong bakuna bisan way pagtugot sa gobiyerno?

Murag nahimong kataw-anan ang maong mga ahensiya kay mas gamhanan pa kanila ug sa balaod kining mga nag-una-una pagpabakuna.

Ang pangutana mao kini: angay ba diay sawayon kining mga tawong maka-afford pagpabakuna?

O mas maayong pasagdan nalang total ila man kining kwarta ug ilang risgo.   Dunay pandemiya karon ug tanang mga tawo, bisan mga kabus gustong mabakunahan.

Klaro usab gikan sa mga tubag sa Malacañang nga daw dili interesado ang Palasyo sa maong imbestigasyon. Apan namahayag nga kinahanglan ang tanang hilisgutanan bahin sa bakuna moagi sa hustong proseso.Apan sa nanghitabo karon, murag di kinahanglang  mosunod sa hustong proseso kadtong miyembro sa administrasyon.

Patas unta, way tuisay sa balaod ug way paborpabor.

Maayo pang suspensuhon nalang una kining mga balaora mentras tanto dunay pandemiya kung mao na aron way moisa ang kilay. Maayo og ingon niana sab  ilang tratamento sa uban bisag di nila sakop.

Kun gusto nilang mosunod ang mga tawo sa mga lagda, sila untay unang motahod niini.