Ang Sugbo kaniadto

Kon ako maoy pahukmon, atol sa pagsaulog sa Charter Day sa siyudad sa Sugbo, ilakip nako ang paghandom sa kanhiay’ng panahon aron mahibawo kadtong wa pa masayod kon unsa ang Sugbo kaniadto.

Gisaulog sa siyudad sa Sugbo kagahapon ang ika-84 ka tuig gikan sa pagkahimo niining dakbayan kaniadtong 1937. Dihang mayor pa si Vice Mayor Michael Rama, si Don Vicente Rama ra usab maoy gipasigarbo pag-ayo.

Si kanhi senador Vicente Rama maoy nagmugna og balaud nga nagpahimo nga siyudad sa Sugbo nga kaniadto usa lang ka lungsod. Wala na gani hisguti pa ang mga nangaging mayor sa siyudad.

Para nako, mosamot kanindot ang pagsaulog nato sa sumad sa pagkahimong siyudad sa Sugbo kon apil nga atong handomon kon unsa ang Sugbo kaniadto, ilabi na kon ipakita nato unsay kanhi porma sa siyudad.

Wa man usab kini buhata bisan pa sa termino ni kanhi mayor Tomas Osmeña. Apan nindot baya kon iapil nato sa paghandom kon unsa ang Sugbo niadto, sama nga ipakita nato ang hulagway sa munisipyo sa Sugbo nga gihimo na karon nga City Hall.

Ipakita ang mga “aerial view” sa Cebu kaniadto, ang mga building nga wa na karon, ug sigurado ko nga daghan pa ang wa makakita sa maong mga talan-awon, ilabi na ang dagway sa Sugbo dihang wa pa mahimoi og reclamation project ang Pier 1; ang North Reclamation Area ug ang SRP.

Kaniadto, dagat na man kana sa likud gyud sa Fort San Pedro. Ang nahimutangan usab sa menteryo sa mga Insik diha sa Carreta, dagat na kana diha kaniadto ug lahi pa ang porma sa mga karsada.

Aw lungsod pa ang Sugbo kaniadto, apan sigurado ko nga makapanindot sa atong paghandom ang maong mga talan-awon.

* * *

Bitaw, naghisgot na man gyud ta sa karaang panahon, misantop sa akong hunahuna nga ang kasapaan nato dinhi kaniadto hilabihan ka lapad, apan karon nahimo na nga kanal.

Ang lapad nga sapa nga nagpabiling wa gyud mailog sa mga tawo nga hangol kaayo’g pwesto, mao na lang ang sapa nga gikan sa Guadalupe ug anaa molapos sa may utlanan sa Barangay Ermita ug Pasil.

Apan ang kabahin sa maong sapa, gianam-anam na usab sa pagpagamay didto dapit sa may Barangay Sambag 2, kay mga haligi anaa na sa sapa. Hinoon, naglisud sila tungod kay lawom ang maong sapa.

Ang sapa sa Parian nga anaa mag-agi dapit sa Colon, lapad kaayo kini kaniadto nga makasulod ang sakayan nga may katig, apan karon, bisan pa’g way katig maglisod.