Nganong mas daghang tinakdanay
Gipahibawo sa Department of Health (DOH) nga ang pagsulbong sa bag-ong mga kaso sa COVID-19 sa Sugbo nakapaburot sa positivity rate sa tibuok nasud. Gibutyag sa DOH nga sa Pebrero 14-20 niabot og 13,050 ang positibo o positivity rate nga 6.1%. Gitandi sa DOH ang Central Visayas (nga kapin sa 98% sa mga kaso gikan sa Sugbo) ug kaulohan:
14.8% (2,959 sa 21,537 ka swab samples) ang positivity rate sa Central Visayas; samtang
4.8% (5,503 sa 123,554) ang positivity rate sa Metro Manila.
* * *
Samtang nagpabilin nga mas daghan ang kaso sa Metro Manila, kay kapin na man sa 14 milyones ang ilang mga molupyo, nakaapas ang gidaghanon sa inadlaw nilang swab tests.
Maong natultolan, natambalan ug nabuwag dayon ang bag-ong mga kaso sa wa pa makapanakod sa mas daghan.
Kay nabiyaan man ang gidaghanon sa swab tests sa Sugbo, mas daghan ang posible nga nataptan sa kagaw nga wa pa matultoli, matambali ug mabuwag ug busa dako ang kahigayonan nga makapanakod sa ubang mga sakop sa ilang pamilya ug mga silingan.
* * *
Ang taas nang daan nga positivity rate sa Sugbo sa niaging semana nalabwan sa pagsugod karong semanaha.
Niabot og 17.52% ang positivity rate sa Sugbo niadtong Lunes, segun sa inadlawng taho sa DOH, dihang nagpositibo ang 380 sa 2,174 ka swab samples.
Labihan kataas kon itandi sa atong silingan nga lalawigan sa Bohol nga duna lay 2.48% nga positivity rate (tulo ra ang positibo sa 121 nila ka swab samples).
* * *
Sayop ang pangangkon sa DOH ug sa lokal nga mga opisyal nga di angayng kabalak-an ang pagsulbong sa bag-ong mga kaso sa Sugbo kay nanukad ra sa mas daghan nga swab tests sa iyang mga laboratoryo kon itandi sa ubang bahin sa nasud.
Angay nilang angkunon nga padayong nidaghan ang bag-ong mga kaso tungod sa kakuwang sa swab tests sa Sugbo.
Mas modaghan pa gyod ang mangasakit kon di nila madugangan ang swab testing.
Nga mahimo lang kon tinud-on nila ang contact tracing aron matultolan sa labing dali nga panahon ang tanang nakaduol ug posibleng natakdan sa bag-ong mga kaso.
* * *
- Latest
