Di na angay mobalik

Angay ba nga ipaubos na usab sa mas estrikto nga community quarantine ang dakbayan ug lalawigan sa Sugbo human sa giingon nga pagkadiskubre sa duha ka variant sa coronavirus disease o COVID-19 dinhi dili pa lamang dugay?

Hinuon alang sa mga lokal nga opisyal, dili na angay nga moligid pagbalik ang siyudad ug probinsiya ngadto sa mas hugot nga lockdown gumikan niining bag-o nga kalamboan. Kini tungod kay dili gayud kini makaayo sa lokal nga ekonomiya.

Gani, grabe nga nakayawyaw si Gobernador Gwendolyn Garcia human nga gisugyot didto sa kaulohan nga ipailalum ang Sugbo sa general community quarantine gumikan sa seryoso nga kahimtang sa COVID-19 dinhi.

Bitaw. Unfair kaayo kun makadesider ang nasyonal nga kagamhanan pagbutang pagbalik sa Sugbo sa GCQ niining panahon nga milagsik na pagbalik ang lokal nga ekonomiya ug daghan nang establisimento ang mibalik sa ilang operasyon.

Sa dihang gipailalum ang Sugbo sa hugot nga enhanced community quarantine sa niaging tuig, hilabihan ang pagtiurok sa lokal nga ekonomiya. Nahisama kita sa ghost town tungod kay sirado atong mga border gikan sa mga taga gawas.

Instead nga ipailalum ang Sugbo sa estrikto nga lockdown, mas labing maayo kun mas pahugtan pa sa otoridad ang implementasyon sa mga health protocol. Dili ikalimod nga daghan na ang wala misunod sa mga lagda gumikan sa relaks nga pagpatuman.

Miarangkada na ang atong mga establisimento. Ug angay lamang kini nga sustinihan alang sa hingpit nga pagbangon sa ekonomiya sa Sugbo.

Kini aron usab nga kapugngan ang pagkutoy sa tiyan sa katawhan nga hagbay ra nga gilisudlisod niining maong balatian.