Pailob, paabuta lang

Giingon nga mipadayag na si Presidente Duterte nga hapit na mahurot and iyang pailob tungod sa kalangay sa pag-abot sa bakuna batok COVID-19 dinhi sa nasud. Tungod sa maong kasagmuyo, gilauman ni Sec. Roque nga mopaspas na ang pagpadangat sa bakuna.  Na hala, di na lang ta modugang pa’g komento, labi na gyud kadtong wala pa makumbinsir nga magpabakuna. Nitingog na bitaw ang Presidente.  Kay ginaingon baya nga “Ang pagkawalay pailob magtukmod bisan sa maalamon nga tawo pagbuhat ug mga tinonto.” Ginhawa Delfin!

Lupigan ang langayan

Mipagawas ang DILG og direktiba ngadto sa PNP nga magmabinantayon ug dakpon gilayon kadtong magpayuhot ug mamaligya’g mga peke’ng bakuna batok COVID-19. Giwahag usab sa DILG ang publiko sa dili pagpalit niini ug sa pagtahô gilayon sa kapolisan kon adunay gidudaha’ng pagpamaligya sa pekeng bakuna.  Sa kalangayan sa gobyerno, naunhan na lang sila sa mga maantigo nga entrepreneur pagkompra ug pagbaligya sa bakuna.  Busa igo na lang sila pag-pasidaan nga adunay peke nga mikuyanap. Lupig sila!

 Bayad sa gubat-gubat

Gikaulaw ni Senador Lacson ang gipamulong ni Presidente Duterte nga angayan mobayad ang Amerika sa Pilipinas kon buot pa kini nga ipadayon ang Visiting Forces Agreement kay lage, alang kaniya, dili kita nasud sa mga extortionista.  Apan alang usab kang  DFA Secretary Locsin, mahimong dili kwarta ang ibayad sa Amerika kon dili mga butang sama sa helicopter ug mga missiles.  Komento sa akong pilosopo’ng silingan, “Angayan mobayad ang Amerika kay nakapahimulos man usab sila dinhi’s atoa.  Ang buwangan naa man gani pulta bisan lingawlingaw ra, ang VFA pa kaha nga maggubatgubat pa!  Baya no!

Parehong gisabaan

Mipasalig ang PLDT ug ang Smart Communications nga dili mahunong ang ilang serbisyo bisan pa man sa hulga sa Bagyo’g Auring kay aduna na sila’y andam nga mga personnel nga motubag kon adunay mga kakuli-an.  Kitang tanan nakasinati sa dili maayong serbisyo sa mga telcos bisan pa man kon walay bagyo.  Magpaabot na lang unya kita sa explanation kon ugaling mapalpak. Nakapahinumdum kanako sa panghitabo sulod sa restawran diin mihangyo ang customer ngadto sa waiter nga PAHINAYAN ang jukebox kay kusog ra kaayo.  Apan mibalibad ang waiter sa pag-ingon, “Sorry Sir, di ko kadungog nimo kay sabâ kaayo ang jukebox”.  Atala lageee!

Gitangtang kay kulang

Gikataho nga adunay 39 ka party-list organization nga gitaktak sa listahan sa COMELEC pinasikad sa probisyon sa Party-List Sytem Act of 1995.  Ang nag-una nga rason sa pagtaktak mao nga wala sila makakuha sa minimum nga 2% nga boto nga gikinahanglan.  Inay magpunay’g panangtang sa listahan, angayan tingale amendahon ang balaod aron mahugtan sa COMELEC ang rekisitos una marehistro ang usa ka Party-List.  Mora na man lang ni sila og mga uhong nga mokalit ug tubo atol sa eleksyon.  Fezteleern!