Mayor miawhag, ayaw’g kumpiyansa

Sa press conference ni Cebu City Mayor Edgardo Labella kagahapon, akong naaninaw nga maayo na ang iyang panglawas. Dili na sama kaniadto nga makita nga mora’g namurot ang iyang nawong, nga daw mora’g Intsik siya nga tan-awon.

Kagahapon, makita nga nahibalik na gyud ang orihinal nga panagway ni Mayor Labella apan gitataw niya nga dili pa gihapon siya mag-opisina sa City Hall.

Atol sa press conference, gitataw sa mayor nga nagpadayon siya sa iyang gimbuhaton pinaagi sa paghimo og miting sa mga opisyal sa City Hall ug uban pa.

* * *

Gipahibawo sa mayor nga bisan pa’g mangabot na ang mga anti-Covid vaccines ug mabakunahan na ang katawhan, dili gyud gihapon angay nga mokumpiyansa. Gihimong sanglitanan sa mayor ang OFW nga taga Mandaue City nga nagpabakuna na paggikan niya didto sa United Arab Emirates dihang paingon siyang mipauli dinhi, apan dihang mobalik na unta sa UAE, ug gi-swab test pag-usab, positibo na, apil pa ang iyang pamilya.

Husto si Mayor Labella nga bisan og mabakunahan ka na og anti-Covid vaccines, ayaw gihapon pag-kumpiyansa, mag-mask gihapon kon mogawas kita sa atong panimalay ug likayan ang pakigdikit sa laing tawo.

* * *

Unya, kamong mga senior citizens, hala, sabta kini pag-ayo aron nga dili na kamo magsige’g pangutana diha sa page sa social media nga daghan ang motubag nga wa sa’y klaro.

Gibutyag usab sa mayor nga mandoan niya si Jeffrey Ocampo, executive director sa Cebu City Office of Senior Citizens Affairs (OSCA) aron andamon na ang payroll sa cash assistance alang sa Enero, Pebrero ug Marso.

Nagpasabot ni nga sa Marso na mohatag ang Cebu City government sa cash assistance sa mga senior citizens. Ako gyud ni nga ipahibawo kay daghan kaayo ang dili makahuwat, ug magsige’g pangutana kon kanus-a na sab sila makadawat.

* * *

Kay duna may nagsingabot nga bagyo, nga gikatakda nga mopingis pag-igo sa Sugbo karong Domingo, awhagon nako ang katawhan nga pamutli ninyo ang mga  sanga sa kahoy nga anaa duol sa inyong kabalayan.

Usa kini sa pamaagi aron nga malikayan ang mga disgrasya kay basin og mabali ang mga sanga, o kaha matumba ang kahoy, pananglit mokusog ang hangin. Aw, dili man hinoon kaayo kusog gyud ang hangin niining bagyoha, apan way kumo sa pagpangandam daan, ilabi na ang pagpangandam sa lunop ug baha.

Kadtong anaa sa mga lupa nga dapit ug kanunay lang lunopan, pangandami daan kay basin og mosaka ang tubig gikan sa baha.

Basin og mosawom sa tubig ang inyong kabtangan ug dili na hinuon kapahimuslan.