Mag-imbestigar ang CHR

Imbestigaron sa Commission on Human Rights (CHR) ang operasyon pagluwas sa kapolisan sa mga minor de edad nga mga lumad nga taga Davao del Norte nga giingon nga gidagit ug gikoptan sa mga rebelde’ng komunista.

Ang mga polis namasangil nga ang mga minor de edad mga tinun-an sa tunghaan nga gipadagan sa mga komunista apan gipasirad-an sa Department of Education. Ang mga polis miingon nga ang mga ginikanan sa mga minor de edad nagpatabang kanila sa pagpangita sa ilang mga anak maong ila kining giluwas.

Apan ang kaparian sa University of San Carlos ug Societas Verbi Divini Philippines nga maoy nagpadagan sa Retreat House nga maoy gipuy-an sa mga minor de edad ug nahimotang sulod sa University of San Carlos Talamban Campus nanghimakak sa pasangil sa mga polis. Ilang giingon nga ang mga minor de edad nga gikuha sa mga polis giatiman, gialimahan ug gihatagan og pagtratar nga makahatag og pinakamaayo nga interest alang kanila.

Ang tunghaan miingon nga ang mga minor de edad kabahin sa 42 ka mga delegado nga misalmot sa kalihokan sa tunghaan niadtong Marso 2020 apan wala na makapauli sa ilang komunidad tungod sa coronavirus lockdown. Matud pa sa tunghaan nga wala na kinahanglana ang operasyon sa pagluwas tungod kay ang presensiya sa mga minor de edad sa ilang Retreat House alang sa kaayohan sa mga bata ug sa tibook nilang pagpuyo sila giatiman, gialimahan ug gihatagan og pagtrato nga pinakamaayo alang kanila. Tukma nga imbestigaron sa Commission on Human Rights ang operasyon sa pagluwas tungod kay managlahi ang pamahayag sa mga polis ug tunghaan. Sa imbestigasyon molutaw ang matuod gikan sa bakak.

Ang dako lang pangutana, anaa ba kaha tay mapaabot nga resulta sa illang imbestigasyon? Sige man lang god ni imbestigar ang Commission on Human Rights pero wala gayoy nahuman ug walay resulta ang ilang imbestigasyon.