Bayranan pakubsan

Husto gyud ang gihimo sa Malacañang, pinaagi sa Department of Transportation, nga giawhag nila ang mga tag-iya og Private Motor Vehicle Inspection Centers nga pakunhuran ang taripa sa ilang mga bayranan.

Unya, nakahukom kuno ang mga tag-iya sa mga Private Motor Vehicle Inspection Centers nga dili na sila magpabayad sa subli nga pag-inspection sa mga private ug public utility vehicles sa usa ka tuig.

Ang mga Motor Vehicle Inspection Center sa lainlaing dapit sa nasud nga gigamit sa Land Transportation Office pag-inspection sa mga sakyanan aron pagsuta kon maayo ba nga padaganon, gipanag-iya kini sa mga pribadong magpapatigayon nga nakigsosyo sa DOTr.

Tungod sa kaestrikto ug kadako sa bayranan nga nagbaguod ang daghang mga tag-iya og sakyanan, ang mga motorista nangreklamo ug nasayran kini sa Malacañang.

Matud ni Transportation Assistant Secretary Giovanni Lopez nga ang testing fee sa sakyanan pakunhoran gikan sa P1,500 – P1,800 nga magdepende sa gidak-on ug himoon na lang nga P600.

Gipublikar nga ang bayranan para sa mga motor pakubsan ngadto sa P500 ug ang mga public utility jeepney P300 na lang.

Maayo baya ang paagi nga sa dili pa ipa-renew ang rehistro sa sakyanan tan-awon gyud kon dili ba pundir ang mga suga, mogunit ba ang iyang brake, may hand brake ba ang sakyanan, uban pa nga mga accesories.

Nganong estriktohon man ang pag-inspection sa mga sakyanan? Kay didto gud sa Metro Manila kaniadtong 2019, dunay 121,771 ka road accidents (334 ka aksidente kada adlaw), ug nakakalas sa 372 ka kinabuhi ug 20,466 ang nangaangol.

* * *

Ang nindot nga tan-awon sa Malacañang mao ang pakighinabi sa mga tag-iya og Private Driving School nga pakubsan usab nila ang bayranan sa mga magbansay pag-drive.

Samtang nindot nga sutaon kon ang usa ka aplikante nga mokuha’g lisensya sa pag-drive, makamao na ba nga mo-drive masayod sa mga balaod sa pagmaneho, apan mahal ra kaayo ang bayranan uy.

Klaro kaayo nga gipahimuslan na sa mga tagdumala og mga driving school. Sayonan ka nga kon magpa-upgrade ka sa “restriction” sa lisensya, pakuhaon ka na gyud og training certificate.

Ang mga bag-o gyud nga magkuha og lisensiya kay nasugamak gyud sa dagko nga mga bayranan. Apan, usbon nako, nindot ni basta wa lay mga palusot apan menosan lang sab ang kantidad sa bayranan.

Ang nindot nga kadtong mopa-renew sa lisensya, i-subject lang og test nga way bayad, ug kadtong dili makapasar sa test, dili isyuhan og lisensya, unya wa gyuy palusot.

Daghang driver wa makasabot sa mga traffic signage kay mibayad ra man sila paglukat nila sa ilang lisensya. Unsaon nga may mga kurakot man pud diha sa LTO.