Vehicle testing center binuang

Bag-o lang kong nagpa-renew og rehistro sa akong sakyanan diin akong nasinati unsa ka dakong kalbaryo ang gipaagiang dalan sa Land Transportation Office (LTO) sa mga nangaplay.

Nagpa-emmision test na ko daan. Na-test na akong sakyanan. Pasar!

Apan dili maproseso sa emission center ang dokumento kay wala pa kuno ma-upload sa LTO ang bag-ong plate number.

Maong miadto kog SM Seaside. Pastilan, sa kalayo sa akong gidaganan, wala man dawata sa LTO-SM Seaside akong tuyo.

Atua kuno sa LTO-Robinson Galeria ang uploading sa mga bag-ong plate numbers. Busa, miadto ko. Pag-abot nako sa LTO-Galeria, gipasa na sab ko sa in-charge didto sa Private Motor Vehicles Inspection Center (PMVIC), nahimutang sa kanhi North Terminal Bus kay tua kuno didto ang mo-upload.

Pag-abot nako didto, gisultian ko sa taga PMVIC nga ang ila didto para vehicle inspection ra kuno ug walay uploading.

Ang nakaparat, kay nakabayad na ra ba ko’g P1,800 para sa PMVIC, diin nagsakit akong dughang nagtan-aw kon giunsa nila pagtsek-ap akong sakyanan.

Bisag bag-o akong sakyanan, pirmeng gipa-periodic maintainance every 5,000km sa kasa, suwabe ang inandaran, giukban pa gayod sa tig-inspect ang hood. Unya ang matag ligid, ipabuwasot niadtong lungag aron sukdon ang kabag-on.

Ug kay baga pa man akong mga ligid, lawom kaayo ang mga samad nga agi sa ilang pag-inspeksiyon. Diha ko na madiparahi pag-abot nako sa amoa. Makahayblad, uy!

Ang wala nako magustohi, ang tig-inspect maoy midrayeb sa sakyanan, dili ang tag-iya. Bisan tuod magsul-ob kinig white COVID-19 protective vest, iya ra kining huboon inig human. Unya ibalik pagsul-ob kon adunay laing magpatsek-ap.

Samtang ang iyang gilingkoran driver’s seat, dili pa gyod i-disinfect.

Haskang kompiyansaha!

Nagbayad ka na’g mahal, bun-ogon pa imong sakyanan, unya kuyaw ka pag magka-COVID-19.  Kini nagpaila lang, nga dili pang-inspeksiyon ang ilang tumong. Kon dili, pangguba aron paggastohon ka pag dako.

Nalingaw ko sa pagpangasaba ni Senador Richard Gordon ngadto sa DOTr ug LTO tungod ning mga kapalpakan ug pangabuso nilang gihimo.

Gusto sa senador, nga pangsibakon sa puwesto ang tanang nahilambigit niining nagkadaghang binuang sa LTO. Nga, matud pa ni Gordon, morag gihimo nang negosyo.

Unta, MVIS/PMVIC uban ang nagpasiugda, matangtang na sa hingpit.