^

Smugglers ang angay dapogon

BALITAHOM - Atty. Jose Marie N. Poblete (Banat) - February 11, 2021 - 12:00am

Mga mahalon nga sakyanan nga nagkantidad og P30 milyones ang giguba sa taga-Bureau of Customs (BOC) sa Cebu sa mi-aging adlaw. Ang maong pag-guba subay sa kamandoan ni Presidente Duterte aron mahunong na ang “smuggling” sa maong matang sa sakyanan.  Wala makauyon sa maong lakang ang akong higala. Matud niya wala gyud intawo’y sala ang mga sakyanan apan sila maoy nahiagum sa silot.  Ang mga kanahang smuggler ug pipila ka kakunsabo nga empleyado sa BOC mao unta ang angay dapogon sa bucket sa backhoe.  Padayon gihapon ang palusot. Fezteleern!

Ang balaang plaka

Alang kang Senador Richard Gordon, dili lamang ang mga mamumunô kon dili lakip usab nga mabasol ang LTO sa kamatayon sa usa ka labor union leader didto sa Tondo, Manila. Tungod kini sa pagdumili sa LTO pag-implementar sa balaod nga tauran na og dagkong plaka ang mga motorsiklo. Mora’g baligho man ang panahom ni Senador Gordon.  Wala man tingale kalambigitan ang intensyon sa mga mamumunô pagpatay sa labor leader sa plaka sa motorsiklo bisan kon mora’g pligo sa plywood pa ang gidak-on niini.  Sama sa gibuhat sa Customs pagguba sa mga gipayuhot nga sakyanan, ang motorsiklo na ba usab ang atong silotan inay ang mga kriminal?  Madahaan!

Swab test sa manag-uyab

Misugyot si LtCol Wilbert Parilla, ang CCPO Deputy Director for Operations, ngadto sa mga manag-uyab nga dili lang una magkitaay karong Valentine’s Day sa tumong nga malikayan ang mahimong pagtakod sa coronavirus ngadto sa usag-usa.  Mora’g di man gyud kapugngan ang manag-uyab. Amendahon na lang kaha ang Executive Order sa dakbayan diin padalhon na ang mga manag-uyab sa resulta sa ilang Swab Test.  Mahimo’ng ihikling na lang ang Letter of Acceptance kay dayag nga gidawat na sa manag-uyab ang matag usa kanila.  Hala no!

Summit sa baboy ug manok

Miawhag ang Pork Producers’ Federation of the Philippines (ProPork), sa kagamhanan pagpahigayon og halapad nga dayalogo tali sa mga stakeholders aron matubag na ang maong suliran sa pag-imponer sa “price cap” sa karne’ng baboy ug manok.  Pagatawgon ang maong dayalogo nga “Pork and Chicken Summit,” apan wala hinuon ipasabot nga apil ang mga baboy ug manok sa maong panagkulokabildo.  Ka-alegre kaha tingale kon hatagan ang mga hayop og higayon pagpadayag sa ilang habig.  Pagkatoytoy!

LBC-libre’ng bakuna sa COVID-19

Mipahibalo ang LBC Express, Inc. nga nakakuha sila og mga bakuna batok sa COVIDN-19 ug nakig-alayon na sila sa kagamhanan aron makatabang sa pakigbatok sa coronavirus.  Ang mga nakuha’ng bakuna libre’ng ipang-apod-apod ngadto sa ilang mga empleyado.  Haum sa katuyoan sa gobiyerno ang maong lakang sa LBC. Tungod niini, maingon ta nga ang mga letra’ng LBC, nagkahulogan usab diay nga: “Libre’ng Bakuna sa COVID”.  Na hala, sugdi na ang delivery!  Owrayt!

BUREAU OF CUSTOMS
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with