Pagpanghatag ipanabi maot

Sa Oktubre 2021 pa ang pagpayil og kandidatura sa gustong molansad.

Pero layo pa gani, hagbay rang nagsugod og sekretong pangampanya ang pipila kanila gamit ang kahimtang sa pandemiya.

Sama niadtong tarpaulin (gikuhaag hulagway sa mi-post niin sa FB, pero gitangtang na), diin nagbansiwag ang dakong hitsura sa usa ka public servant uban ang pahibalo nga nanghatag siyag libreng facemasks sa katawhan.

Gidabodabohan kini’g pagsaway. May mikomentariyo nga nangita na sab kuno ang maong public servant og paaging makabulsa’g saag kuwarta gikan sa pagpamalit og binultong facemasks.

Aduna poy miingon, nganong angkonon man niyang iyang hinatag ang maong ipanghatag nga kuwarta man sa katawhan ang gibayad niini?

Usab, naay mipahayag: “Okay lang kon iyahang salapi ang gipalit niini. Pero, bisan pa, dili na kinahanglang ibandilyo ngadto sa publiko. Pagkasayong namolitiko!

Nia pa ta sa pagpakiggubat sa COVID-19. Ipadaplin usa ang pa-pogi points!”

Hinuon, kadudahan kon kinsay nagplastar sa nahisgotang tarpaulin?

Ang mga sakop ba sa administrasiyon, o ang taga oposisyonista, kinsa gustong daoton ang namunoan?

Apan ang administrasiyon man o dili ang naghimo niini, dili gyod maayo ipanabi sa katawhan ang unsay nahatag sa usa ka buotang mangangalagad.

Kay dili malikayan nga diha sa atong pagbandilyo, wala tay kalibotan nga adunay tawong mahimangod.

Sama ning usa ka hitabo. May engrandeng kasal. Panahon sa salosalo, mipaso ang mga bisita nga pulos luho ang gipangsul-ob. 

Pag-agi sa usa ka guwapang dalaga sa lamesang gilibotan sa mga adunahang babayeng nangaon, usa kanila miingon: “Kana uroyng sinina nga iyang gisul-ob no, ako uroy nang hinatag!”

Haskang ulawa intawon sa dalagang nakadungog, uy! Unya, maayo kaha, nga tungod sa imong pagpanghambog, adunay linalang nga nasakitan?

“Kon aduna moy ihatag sa kabos, ayaw’g banha ingon sa gibuhat sa mga tigpakaaron-ingnon sulod sa mga sinagoga ug kadalanan aron dayegon sa mga tawo.

Makapaniguro ko ninyo nga gigantihan na sila sa angay.” (Mateo 6:2)

“Kon duna moy ihatag sa kabus, ayaw pahibaloa ang walang kamot sa gibuhat sa tuo aron ang inyong gasa magpabiling tinago.

Ang inyong Amahan nga nagtan-aw moganti ninyo sa tago.” (Mateo 6:3-4) Gikan ni Hesus kining maong mga pulonga, kinsa mipasabot, nga ang pagpanabi sa unsay gihatag, maot!