Dakong problema

Daghan gyud ang nagtuo nga estriktohon gyud ang quarantine status sa Cebu City kon dili mabangbang ang pagsaka sa coronavirus disease.

Kon si Mayor Edgar Labella ang pagbut-on, gusto ra siya nga ipabilin lang ang Dakbayan sa Sugbo sa Modified General Community Quarantine (MGCQ) nga maoy labing lugak sa pagpatuman og mga security measures.

Apan dili imposible nga ang mga sakop sa Inter-Agency Task Force (IATF) dili mamati kang Mayor Labella kay makita man sa rekord nga ang active cases sa COVID dinhi sa siyudad misaka na karon sa 1,150.

Sayonan ka nga niadtong nagsingabot pa ang Pasko ug Bag-ong Tuig, duna na lang unta’y 83 ka active cases, ang gidaghanon sa mga natakboyan og virus nga anaa sa mga ospital ug isolation centers.

Pero karon, gikan sa 83 misaka na ngadto sa 1,150 hangtud kaniadtong Huwebes sa hapon. Kaniadto, kada adlaw may duha, tulo, lima ug siyam na lang unta ang bag-ong matakboyan og virus.

Apan karon abi ninyo og pila? Kaniadtong Huwebes gipahibalo sa Department of Health nga dunay 103 ka bag-ong kaso sa COVID-19 ang dakbayan sa Sugbo ug mag-una na sab ta sa mga dapit sa nasud nga daghan og new infections.

Swerte lang hinuon nga ang gidaghanon sa mga nangamatay gilansang sa 701, apan miabot na og 12,219 ang kinatibuk-ang natakboyan sa virus sukad kaniadtong Pebrero sa miaging tuig.

Mao nga dili na kita mahibulong kon ang siyudad sa Sugbo ipaestrikto ang pagpatuman og quarantine. Maayo sab aron motagam ang mga gahi’g ulo nga mogawas sa ilang balay nga dili mag-mask.

* * *

Duna man diay mga senior citizens nga wa gyud ganahi nga ipaagi sa cash cards ang paghatag kanila sa ilang cash assistance gikan sa Cebu City government.

Sigurado ko nga kon hingpit na nga mapatuman nga ang tanang cash assistance ipaagi na sa cash cards sa Land Bank, magpungasi ang reklamo gikan sa mga senior citizens nga ubay-ubay kanila ang dili makamao sa ATM.

Ikaduha, kon magpunsisok sa mga ATM sa Land Bank ang 84 mil ka senior citizens aron mokuha sa ilang cash assistance, tag-asa kaha sa linya no? Pananglit adto sila mokubra sa ubang ATM, daghang senior citizens nga wa masayod nga ang ilang kwarta, ibanan og P15 kada transaksyon.

Pananglit pagsugod nila ilang susihon kon pila ang ilang kwarta, unya makita nila nga P3,000 aw inighuman nila’g inquire, menosan na og P15 ang ilang kwarta.       Inig kubra na usab nila, laing P15 ang ibanon sa bangko sa ilang pundo.

Pananglit manugo sila, aw sigurado nga ang ilang gisuso pagpakubra hatagan gyud nila og mosamot nga gamay na lang ang ilang makuha.