Hangtod kanus-a ang pangiyugpos
Nabawo ang imbestigasyon sa ilegal nga pagpamakuna sa mga sakop sa Armed Forces of the Philippines (AFP) ug sa gabinete ni Presidente Rodrigo Duterte nga gilusad sa Department of Health (DOH) ug sa Food and Drug Administration (FDA) kay:
Nitak-om na ang mga opisyal sa Malakanyang nga nangangkon nga may kasayuran sa kontrobersiya; ug
Pagdumili sa mga imbestigador sa pagpalawom sa ilang pakisusi kinsa ang nagpayuhot sa bakuna nga wa pay pagtugot gikan sa gobyerno, kinsay nihatag sa bakuna ngadto sa Malakanyang ug kinsay nitugot ug kinsay aktuwal nga namakuna.
* * *
Nahibawo na tang daan nga way mahitabo sa mga imbestigasyon nga gipasalig sa nagkalainlain nga mga buhatan sa gobiyerno apan makapahugno lang gihapon nga natinuod ang atong kabalaka. Ambot unsay mas pait: Kon giangkon na lang sa palasyo nga way masilotan sa eskandalo; o ning ilang pag-ulug-ulog og taphaw nga mga pakisusi.
Mas maayo na lang ang DOH ug FDA kay nakasugod sa ilang imbestigasyon kon itandi sa mga senador nga mas pagarpar apan nikakak human pasidan-i sa presidente nga di niya ipa-imbestigar ang mga opisyal nga nag-una-una sa pagpamakuna.
* * *
Gi-anam-anam sa Malakanyang pagbakwi ang kasayuran sa pagpamakuna nga sila ra say tinubdan:
Si Presidente Duterte ang nibutyag nga kasagaran sa mga sundawo nabakunahan sa Sinopharm sa China;
Si Philippine Army (PA) Chief Lieutenant General Cirilito Sobejana niangkon nga ang chain of command nga gipangulohan sa commander-in-chief nga si Presidente Duterte ang nisugo sa pagpamakuna;
Si Interior Secretary Eduardo Año nipahibawo nga may mga sakop sa gabinete nga nabakunahan; apan
Si Presidential Security Group (PSG) Chief Brigadier General Jesus Durante niinsistir nga sila ray nibakuna sa ilang kaugalingon.
* * *
Ang pagdumili ni Durante pagtubag sa sinuwat nga mga pangutana ni Health Secretary Francisco Duque mahimong mao say iyang himuon sa buwag nga pakisusi sa National Bureau of Investigation (NBI). Bisan mahimo untang pangayoan og katin-awan ang Sinopharm nganong napayuhot ang ilang bakuna dinhi.
Masaligon ang Malakanyang nga sama sa naandan dawaton sa katawhan ang pagdumili nila paghatag og dugang kasayuran. Ambot kanus-a kutob ang atong pagpangiyugpos sa pagtabon sa kalapasan nga sila ra say nagtug-an ug sa kahigayonan sa mas dagkong krimen nga padayong gitagoan.
* * *
- Latest
