Ang communist list

Nangreklamo ang mga personalidad nga ang mga pangalan nasulat sa listahan sa armadong kusog sa nasud nga ilang giila nga mga rebelding komunista. Tungod sa reklamo gipapas na sa armadong kusog sa nasud ang ilang gi-post sa social media.

Kun kaniadto adunay narcolist karon aduna na puy communist list ang gobiyerno ni Presidente Rodrigo Roa Duterte.

Ang nakaapan lang kay adunay nalista nga dili komunista. Ang pagbakwi sa armadong kusog sa ilang communist list usa ka pag-angkon nga walay klaro ang ilang lista.

Kun atong palawman ang pagsabot, dili gyod unta ta mabalaka kun mabotang ang atong pangalan sa listahan sa giingong mga komunista tungod kay ang komunismo dili man illegal per se.

Ang komunismo usa ka politikanhon nga pagtuo. Ang Section 18 Paragraph 1 sa Article III sa 1987 nga Batakang Balaud sa Pilipinas nagkanayon nga walay tawo nga prisohon tungod sa iyang politikanhon nga pagtuo ug tingoha.

Busa ang komunista dili gyud mapriso tungod sa iyang pagka komunista. Mahimo lang siya nga mapriso tungod sa gihimo niya nga illegal sama sa pagpangayo og revolutionary tax sa mga negosyante, pagpamanhig sa mga sundawo ug pagpangataki sa mga polis.

Mao ni ang nakapabalaka niadtong mga personalidad nga ang pangalan nalista sa listahan sa mga giingon nga komunista bisan og dili sila mga komunista.

Sa dihang gipagawas sa armadong kusog sa nasud ang communist list unsa man ang ilang tumong? Pagpakauwaw?

Kun may basihanan ang armadong kusog sa nasud sa ilang lista, nganong wala naman kini mopasaka og kaso? Pinaagi niini dili pa unta sila mapasanginlan nga ang ilang gihimo pamaagi sa propaganda.

* * *

Sakto ang nahuna-hunaan ni Konsehal Joel Garganera nga ang mga ginikanan maoy pamultahon o palimpyohon kun masakpan ang ilang menor de edad nga nakalapas sa minimum health standard.

Sa Pilipinas responsibilidad sa ginikanan ang paghipos sa ilang mga anak.