Kuyaw na gyud

Makapaguol. Mao kini ang pulong nga haum kaayo tungod sa pagsaka pagbalik sa mga kaso sa Coronavirus Disease (COVID-19) dinhi sa dakbayan sa Sugbo.

Nag-una ang Cebu City kaniadtong Martes sa talaan sa Department of Health (DOH) nga labing daghan og new COVID-19 infections.

Nganong nahitabo na kini nga sa wala pa ang Pasko ug Bag-ong Tuig, 83 na man lang gani unta ang mga “active COVID-19 cases?” Karon, 700 kapin na.

Tungod kini kay milugak na ang ubang tawo pagtuman sa health protocols nga gitambag sa mga opisyal sa DOH.

Tan-aw nako, posible gyud nga ideklarar pagbalik ang Cebu City ubos sa Enhanced Community Quarantine (ECQ).

Kon mahitabo kini, kitang tanan ang masakripisyo, ilabi na kadtong mga tawo nga kon way trabaho, way sweldo. Busa, magtinabangay kitang tanan aron nga dili mokuyanap pag-ayo ang virus dinhi sa Cebu City ug silingang mga dapit.

* * *

Unsay kalamboan sa isyu sa 93-1 Lots, ang yuta nga iya sa Kapitolyo ug gusto unta nga ilisan sa Cebu City ug og yuta nga ania dinhi sa siyudad.

Ang land-swapping deal napahigayon tali sa mga opisyal sa Kapitolyo ug Cebu City, nahimo atol sa termino ni kanhi mayor Tomas Osmeña ug kanhi gobernador Hilario Davide III.

Nagpirmahay man tuod apan wa gyud kasugdi ug wa malihok kon pila ang bayranan sa mga nag-ukopar sa yuta.

Karon, nga ang gobernador sa Sugbo mao na si Gwen Garcia, gusto sa gobernador nga dili idayon ang maong kasabutan sa pagbayloay og yuta tali sa Kapitolyo ug Cebu City.

Gani, ang labing uwahi nga kalamboan, mipadala na og suwat si Gwen didto sa City Hall ug naghangyo nga iuli sa Kapitolyo ang mga orihinal nga titulo sa kayutaan nila nga naapil sa land swap.

Tan-aw nako, makulbaan na usab pagbalik ang kapin sa 5,000 ka pamilya nga anaa magpuyo sa yuta sa Kapitolyo nga ania mahimutang sa 11 ka barangay sa siyudad.

Pero, unsa man diay epekto niadtong land swapping deal nga gipirmahan sa mga opisyal ubos nilang Osmeña ug Davide?

Tan-aw nako, kon dunay mokwestiyon niining maong isyu, moabot gyud ni sa hukmanan.

Daghan ra ba kaayo sa mga namuyo niining kontrobersyal kaayong yuta nga migamit sa luna sa commercial.

Ang uban, mihimo og mga tindahan diha sa maong luna ug gipaabangan.

Ang nakapait pa gyud kay diha sa Barangay Luz, dunay luna nga kabahin sa 93-1 nga gihimo kaniadto nga tigbakayan.