EDITORYAL - Pagpabakuna gyud

Daghang mga nag viral nga mga videos diha sa social media kabahin sa matud pa negatibong ‘side effects’ sa mga bakuna batok sa coronavirus disease nga Covid-19.

Ang mga nag viral nga video nagpakita sa mga pasyenteng dunay “involuntary muscle movements” o pagkurog-kurog sa kaunoran ug duna gyuy uban nga nalandig sa tambalanan.

Pangangkon pa sa narrator sa maong mga video mga baskog ug himsog ang panglawas sa maong mga pasyente kaniadto apan naingon-ato sila human magpabakuna batok sa Covid-19. Ang mga ingon niini nga matang sa mga impormasyong daling makita sa publiko makapalisod gyud sa gobiyerno pagkombinsir sa mga tawo nga magpabakuna karong panahona. Sa panahon karon, ilabi na nga dunay kompetisyon ang mga higanteng pharmaceutical companies sa kalibotan makamugna og bakuna batok Covid-19, duna gyuy mga pagpangdaot sa usa’g-usa o produkto sa usa’g-usa.

Dili lang gyud unta kini seryusohon sa publiko hangtud nga way opisyal nga kumpirmasyon gikan sa mga otoridad o gobiyerno.  Kinahanglan gyud karon ang bakuna ug mao kini karon ang gitinguhang buhaton sa tanang mga kanasuran. Dinhi sa Pilipinas, basta pasado sa World Health Organization ug sa Food and Drugs Administration ug garantisadong luwas ug epektibong gamiton batok sa pandemiya angay kining dawaton sa katawhan.

Ang WHO nag-ingon pasado na bisan 50 percent efficacy ang bakuna kung dunay pandemiya, butang nga lisud kaayong ipasabot sa publiko tungod kay ang tanan nagtinguha baya og 100 percent efficacy.

Dinhi sa Pilipinas, target sa gobiyerno mabakunahan ang 70 milyones ka mga Pilipino karong tuiga.

Giingong kung tipuon ang tanan, gipasaligan ang Pilipinas nga baligyaan og 148 milyones ka dosage sa tanang klase sa bakuna batok coronavirus virus gikan sa pito ka higanteng pharmaceutical companies.

Sobra-sobra kini para sa kasamtangang populasyon sa nasud nga dul-an 110 milyones. Sa ato pa, ang tanan mabakunahan gyud. Sala na sa tawo kung magdikidiki pa sila pagpabakuna. Kinahanglang magpabakuna aron masigurong luwas ang tanang miyembro sa pamilya gikan sa coronavirus kay basin pa diay kining maong bakuna karon pangkontra sab sa uban pang umaabot nga bag-ong coronavirus variant.