Mas barato apan mahal gihapon
Ang maayong balita mao nga gitugotan na sa Department of Health (DOH) ang bag-ong paagi sa mga laboratoryo sa Philippine Red Cross (PRC) pag-ila sa mga kaso sa COVID-19 pinaagi sa laway.
Hagbay rang gigamit ang teknolohiya sa ubang kanasuran apan naabtan ang DOH og pila ka buwan una nahuman sa ilang pagtuon.
Duha ang kaayohan sa bag-ong COVID-19 test: Mas dali ang resulta (tulo na lang ka oras inay nga pila ka adlaw); ug kalikayan ang kuti, lisod ug ngilo nga pagtusok sa ilong ug lingagngagan aron pagkuha sa swab samples.
* * *
Apan isunod dayon nato ang mas daghan nga di maayo nga mga balita:
Mahal ang bayad sa matag test (P2,000), bisan kon mas ubos na kay sa naandan nga paningil nga P4,000 ngadto sa P10,000, kay mogamit gihapon sa rRT–PCR (real-time reverse transcription polymerase chain reaction) machines sa PRC;
Wa pa mosugot ang Philippine Health Insurance Corporation (PhilHealth) sa paglibre sa test alang sa ilang mga sakop; ug
Di pa takos ang molecular laboratory sa PRC sa Jagobiao, Mandaue City sa Sugbo sa paghimo sa saliva test.
* * *
Ambot tungod ba sa presyo o sa kabag-o pa sa serbisyo, pipila pa lang ang nagpa-reserba sa mga laboratoryo sa PRC sa Mandaluyong ug Port Area sa Manila. Pagsusi nako sa ilang website, daghan pa kaayo ang bakante sugod sa alas-8 karong buntag.
Kon di gihapon mabadlong ang tinakdanay sa mosunod nga mga adlaw, gipaabot nga mas daghan ang mohugop sa mga laboratoryo sa PRC kay mas barato man nga mga alternatibo.
* * *
Ang Research Institute for Tropical Medicine (RITM) nga naghimo sab og buwag nga pagtuon sa saliva test kinahanglan pa nga mosusi sa mga kawani ug kahimanan sa uban nga mga laboratoryo sa PRC una tugotan nga motanyag sa bag-ong teknolohiya. Masaligon ang PRC nga ma-accredit na ang tanan nilang laboratoryo unya sa Pebrero 5.
Tungod sa paglaktaw sa PCR machines, mas barato ug mas paspas ang saliva tests sa ubang kanasuran sa kalibotan: P12 ra ug sud lang sa usa ka segundo sa Israel; ug P250 ra ug sud lang sa usa ka oras sa Estados Unidos.
* * *
- Latest
