Misulbong na pud

Tungod kay mibalik og saka ang kaso sa COVID-19 dinhi sa dakbayan sa Sugbo, ang kagamhanang lokal niini misugod na sa pagpanakop kagahapong adlawa niadtong mga kustomers ug mga manindahay nga dili magsul-ob og facemask kun mosulod sa mga merkado nga gipanag-iya ug gidumala niini. Mao kini ang gisulti sa hepe sa Market Operations Division nga si Irvin Cabales.

Ang dakbayan sa Sugbo nakatala kini og 97 ka mga kaso sa COVID-19 niadtong Sabado, Enero 23 hinungdan nga misaka na ngadto sa 845 ang mga aktibo nga kaso sa dakbayan.

Ang pagsaka og balik sa gidaghanon sa kaso sa Covid-19 sa dakbayan sa Sugbo bunga kini sa pagkagahi og ulo, kompiyansador ug pagkadali nga makalimot sa mga tawo.

Ang Barangay Guadalupe mipahigayon og estriktong pagpatuman sa health protocol human mihugpa sa 27 ka mga sitios niini ang COVID-19. Lakip sa gipatuman sa barangay mao ang pag-awhag sa simbahan sa dili lang una sa pagpatambong og mga tawo sa ilang pagpahigayon og santos nga misa.

Tungod niini daghan ang miisa sa ilang kilay ug nangutana kun puwede ba diay kini nga mahimo sa mga opisyal sa barangay. Daghan pod ang nanaway sa gihimo sa barangay.

Sa pagsaka og balik sa COVID-19 atong mapaabot nga basulon napod sa tawo ang gobiyerno.

Ako lang awhag sa mga tawo nga sa dili pa ta manaway sa gobiyerno, ato usa nga pangutan-on ang atong kaugalingon kun unsa ang atong natampo ngadto sa gobiyerno sa pagpaminos sa gidaghanon sa mga matakboyan sa COVID-19.

Kun nakasabot pa lang unta ta ug misunod sa pahimangno sa gobiyerno, dili seguro mobalik pagsaka ang kaso sa COVID-19.

Kun misabot pa lamang unta ta sa hangyo sa gobiyerno, dili gyod unta seguro mosaka pagbalik ang Covid-19.

Walay laing gipangayo ang gobiyerno, ang ato ra gyud nga pagsabot ug pagsunod.