EDITORYAL - Lugak na sab ang pagbantay

Samtang seryuso ang uban sa pagsunod sa mga health protocols nunot sa hulga sa coronavirus disease, duna say uban nga nilugak ug wa na manumbaling pagsunod niini.

Naobserbahan kini diha sa downtown area sa Cebu City ug Carbon Public Market, dunay mga tawong wala na magsuot bisan facemask samtang naglakawlakaw.

Gawas nga wa na sila magsuot og facemasks, wa na sab nila sunda ang social distancing apan makita nga nasayod silang sayop ang ilang gibuhat apan wa lang gihapon sila manumbaling.

Kaning mga tawhana mao kadtong mga tawong dili kasaligan, mga tawong sugod pa aning pandemiya mosunod lang sa protocols kun dunay nagbantay o manakop.

Kung kang kinsa kini nga sayop, sa mga lokal nga otoridad o sa mga tawo gyung natural ng badlungon ug gahi og ulo, ang hulga sa coronavirus dili tiaw ug ang tanan maoy mag-antos.

Maayo tingaling ibalik sa mga magbalantay ang seryusong pagpanakop ug pagpamulta aning mga tawong klaro gyung wa magpakabana sa uban ug bisan sa ilang kaugalingon.

Sagad ning mga health protocol violators anha manggawas sa dayon nga tigpaniudto, kanang taas na ang adlaw ug init na ang temperatura.

Kini tungod kay anang mga orasa dili naman sab makit-an ang mga magbalantay.

Maayo lang sila sa sinugdanan, sayo sa buntag, apan ini og udto dili na sila igkita

Dili unta ingon niini ang klase sa pagbantay nga himuon, tungod kay dili ikalimod duna gyuy mga tawong gahi kaayong pasundon.

Karong duna na say bag-ong strain sa coronavirus nga giingong mas daling makatakod angay pa gani nga maghipit gihapon sa pagsunod sa health protocols.

Panawagan nato sa atong kapolisan, LGU law enforcers, barangay officials buhata intawon inyong trabaho sanglit mentras wala pa mabakunahi ang publiko pabilin kining hulga.