EDITORYAL - Mas dakong hulga

Kinahanglang motuman ang publiko sa panawagan sa gobiyerno batok niining bag-ong coronavirus variant nga giingong mas paspas nga makatakod kun itandi sa naghamok karon sa kalibotan nga Covid-19.

Pruweba niini mao kining onse ka mga bag-ong kaso sa maong bag-ong coronavirus variant.

Ang maong bag-ong variant nga gitawag og B117 SARS-CoV-2 unang na-detect didto sa United Kingdom.

Matud pa ni Health Undersecretary Maria Rosario Vergeire kining onse ka mga tawong bag-ong positibo mga nakauban kini niadtong 29-anyos nga Pilipinong unang na-detect nga carrier sa maong bag-ong virus.

Sumala pa nga dunay 213 ka mga tawo ang gipangita sa contact tracing teams nga uwahing nakauban sa maong estate agent nga nakabiyahe didto sa Dubai sa United Arab Emirates.

Apil niini iyang uyab nga babaye nga iyang nakauban sa biyahe didto sa Dubai. Una nang gika report nga miinsister ang duha nga samtang didto sa Dubai,  nagsuroysuroy sila sa nagkalain-laing tourist spots didto, apan hugtanon nga gipadayag sa duha nga samtang didto sila nagamping sila didto ug nagtamod sa mga health protocols.

Maayo nalang sab nga ang 159 ka ubang pasahero nakit-an na og gi-isolate. Samtang duna pay uban nga gipangita ug posibleng makasohan human nga wala mosanong sa panawagan sa gobiyerno kanila human nadiskubrehang nakauban nila ang maong real estate agent. Kun itandi sa unang Covid-19 kining bag-ong variant, giingong 30 ngadto sa 70 porsiyento ang gipaspason nga makatakod. Busa, maayo gyud tingaling hinuklogan ug seryusohon sa publiko kining bag-ong hulga.

Kung medyo relax lang sa pagtuman sa health protocols kaniadto, maayo tingali usbon kini sa mga tawong wala kaayo maghatag og bili niini.

Tungod kay kung ang unang variant nakapakamang gani sa ekonomiya sa nasud ug nakahulga sa health care system sa kalibotan sa miaging tuig gumikan sa kadaghan sa mga nataptan ug namatay, samot na kining bag-og variant.