Fight gyud PROBE!

Daygon nako ang mga sakop sa Cebu City Prevention Restoration Order Beautification Enhancement (PROBE) kay bisan og hinay, apan naghimo sila sa ilang trabaho.

Didto ko sa Sitio Kaimito sa Barangay Lorega-San Miguel kaniadtong Domingo ug gitug-anan ko sa akong mga amigo nga giadto sila sa mga sakop sa PROBE.

Kadtong mga atop sa tindahan nga misaylo na sa poste sa kuryente, nga nagpasabot nga kabahin na sa karsada, gipaibanan sa mga tag-iya.

Sa pagsulod nako paingon sa sitio Kaimito atubangan sa barangay hall sa Lorega, may nakita ko nga kabahin sa balay nga giguba, ambot kabahin ba kaha sab to sa paghawan.

Ingon niana ang angay’ng buhaton sa PROBE, kay ang “prevention” nga nagpasabot nga pugngan nila nga way makatukod og kabalayan ug tindahan sa mga public places.

Unya kon may nakatukod na, sila nga mga sakop sa PROBE mohimo og lakang pagpabalik sa naandan nga sitwasyon, ug mao kini ang kahulogan sa “restoration.”

Dasigon nako ang mga sakop sa PROBE nga mopaspas sa ilang trabaho, apan kinahanglan usab nga ang mga opisyal sa barangay, moabag gyud sab sa mao nga kalihokan.

Ambot og ang mga opisyal sa Barangay Carreta, Cebu City naghimo pa kaha sa ilang katungdanan, ilabi na ang ilang kapitan.

Naay karsada diha nga milagbas sa ilang barangay hapit dili maagian og mga sakyanan tungod sa mga gipangparking nga motor ug sa mga tindahan nga anaa sa karsada.

Nindot unta kaayo nga silotan ang mga opisyal sa barangay nga dili makatuman sa ilang katungdanan, ug maayo lang modawat sa ilang mga honorarium.

* * *

Nakabantay ko nga angay gyud nga ang mga opisina sa kagamhanan, ilabi na ang LTO, Office of Senior Citizens Affairs, ug uban pa, duna untay chat group sa social media aron dali ra nga makahatag og kasayuran kabahin sa ilang opisina.

Pagkakaron gud, duna lay mga tawo nga nagmugna og “unofficial chat group” ug ang resulta, bisan kinsa na lang ang motubag sa pangutana sa uban, ug ang ubang motubag sa pangutana mga sayop.

Unta, mahunahunaan kini sa atong mga opisyal sa kagamhanan aron nga mas maalagaran pa nila ang mga magbubuhis, ug kadtong gustong mo-avail sa serbisyo sa maong mga opisina.

Angay nga ang mga hingtungdang ahensya o kaha opisina, modestino gyud og mga tawo nga maoy manubag sa mga pangutana gikan sa publiko.

Sa ingon nga paagi, magiyahan sila sa ilang mga transaksyon ug malikayan nga modangop na lang sila og mga fixers.