Sa unang higayon sukad maumol ang mga kalihokan sa kapistahan ni Senyor Sto. Niño wala nato masaksihan ang naandan nga pagkamabulokon niini nga maoy gidahum sa tanan.
Apil na ang mga dagkong religious activies ug ang mga kulturanhong kalihokan nga mao ang Sinulog Grand Parade nga maoy gidagsa kaniadto sa lokal ug mga langyawng turista.
Nagmingaw ang mga karsada gahapong adlawa nga kanhi sadya kaayo sa mga tinagongdong sa awit sa Sinulog beat uban sa pag ikid ikid sa mga dancers gikan sa nagkadiyang dapit sa nasod ug bisan sa abroad.
Gihulagway nga kinabonggahan ang atong Sinulog sa Sugbo hinungdan nga nakadapit kini sa pagtagad sa mga bisita nga motuyo lang gyud og anhi sa Queen City of the South aron makisadya sa Sinulog.
Apan luyo sa kasadya sa kulturanhong kalihokan, tataw nga natabonan ang tinuod nga tumong sa kasaulogan nga mao ang Balaang Bata nga maoy sentro sa kapistahan sa dakbayan.
Unta sa katumanan o adlaw sa fiesta ang sentro mao ang Senyor Sto. Niño apan ambot lang kong tungod sa kahigwaos sa mga tawo didto naman makatutok sa sayaw sa mga contingents, street party ug ubang mga kalihokan nga nanghinubra na nga dili na gani mahasubay sa pagtolon-an sa Balaang Bata nga maoy gipahinungdan sa fiesta.
Nahimo na nga sentro ang lipaylipay ug komersyalismo nga naglambigit sa kwarta, ang mga baligya hilabihang mahala.
Seguro naay mga deboto nga mohapit sa basilica sa katumanan sa fiesta apan igo ra mohapit ug magdali aron makauna og plastar sa karsada o sa pagsulod sa sports center, ang uban gani dili na gyud moadto sa simbahan kay naghingapi ang lipaylipay.
Kanunay ko kining gisuwat sa akong lindog kada Sinulog ug karon nga aduna nay atong kapanaminan sa atong gipanghimo.
Ang nahitabo karong nga fiesta usa ka pagpahimata sa mga tawo nga ang lipaylipay ug ang mga material nga butang lumalabay lang nga sa usa ka pagpamilok mahanaw. Kini ang gimbut-an sa atong Makagagahum aron mahinumdum kita sa tinuod nga mithi nga ang gipahinungdan nato sa fiesta mao ang Batang Hesus ug dili ang atong personal nga katagbawan.
Gitugot Niya nga wala mapahigawon ang tanan nga kalihokan aron makahinuklog ang katawhan nga patas ang tanan kay ang uban nagtuo nga sila na gyud ang dunay kontrol sa gusto nilang mahitabo, pabonggahay sa performance ug gasto aron makaangkon sa kadaugan.
Walay si bisan kinsa nga tawo ang makatuis ug makasupak sa kabubut-on sa atong Manunubos.
Ang nahitabo karong tuiga mao ang pagbalik nato sa panahon nga yano pa ang tanan, walay mga magarbong pasundayag ug nakatutok ang tanan sa pagyukbo sa Batang Hesus.
Sa simple celebration mabatyagan nato ang kagaan ug tim-os nga kalipay walay stress ug hapsay ang tanan, dili na kinahanglan ma pressure sa palabwanay sa garbo ug kahangol sa mga pagdayeg alang sa personal satisfaction.
Para kanako, angayan kitang magpasalamat sa Balaang Bata nga gibalik kita sa panahon nga Siya lang ang atong gipahinungdan sa tanan.
Salamat Senyor Sto.Niño nga kanunay kami Nimong gipanalipdan sa tanang panahon. Dili na kami kinahanglan pa nga mangayo ug bisan unsa kanimo kay Ikaw nasayod nang daan nga Ikaw ang among gikinahanglan ilabi niining panahon