Reward gipatong sa sayop

Kaniadto giistoryahan ko ni Tatay bahin sa usa ka kasong kriminal nga nahagdaw gikan sa pagpaminaw niyag mga hearing sa korte.

Diin, nindot kaayo paminawon ang kahait sa pagbinayloayg mga pamahayag ug ataki gikan sa mga magkaatbang abogado nga gihayir sa depensa ug sa mikiha.

Matud niya, bisan ang nakapatay, kinsa daling nakalabay-tago sa hinagibang gigamit sa wala pa moabot ang mga polis sa eksena, dili otomatik maakusaran kining mao ang mamumuno. Pero puwede, madudahang suspek.

Nga sa ato pa, mahimong dad-on ang suspek ngadto sa presinto aron imbestigaron ug hatagag kahigayonan paglimpiyo sa iyang ngalan.

Sama niadtong nahitabo sa flight stewardess Christine Dacera, kinsa namatay sulod sa bath tub. Ang tulo sa 11 ka barkada niyang gikauban sa kuwarto – John dela Serna, Rommel Galido ug John Paul Halili – gidala sa presinto ug giimbestigar.

Apan gibuhian sila sa Makati City Prosecutor dihang human estudyohi ang mga ebedensiyang gisumiter sa kapolisan, wala siyay nakitang luna-magtumbok nga si Christine gipatay ug gilugos.

Aduna pay mga suspek nga nakauban sa gipahigayon nilang year-end party nga wala pa mopatim-aw.

Sila gidasig sa kapolisan nga unta motungha na aron paglimpyo sa ilang pangalan. Isaysay ang kinatibuk-ang tinuod hitabo aron mahanaw na ang kalubog sa pagduda ug maoy mopuli ang katin-aw sa kamatuoran. Apan subo paminawon, nga wala pa gani usa kanilang namatud-ang nakahimog krimen, si ACT-CIS Rep. Eric Yap ug Senador Manny Pacquiao mitanyag gilayon og P100K-P500K nga bounty or reward ngadto sa makatudlo hain magtagotago ang mga nahilambigit nga wala pa mopakita sa kapolisan.

Sa laktod, wala pa nilay nahukmang kriminal. Dili pa sila wanted, dead or alive.

Unya, nganong patongan ma’g dakong kantidad ilang ulo? Dili ba usa man kini ka paglapas sa tawhanong katungod?  Wala lamang kini magbuhos og lapok sa ilang pagkatawo. Naghatag pag dakong kakuyaw sa ilang kinabuhi.

Wala sa hustong lugar ang pagkapatong-butang ning reward nga gitanyag nila ni Rep. Eric ug Sen. Manny. Busa, ang legal counsel sa mga gibuhiang suspek, Atty. Mike Santiago, mihangyo sa duroha ka halangdong magbabalaod, nga unta tangtangon ang reward.

Bitaw, dapat lang. Kay di lang kini makadaot sa mga suspek. Hasta sab nilang Eric ug Manny.