Naputol ang kutay sa linawas misa-nobenang abli sa publiko alang sa kapistahan ni Senior Santo Niño tungod sa grabeng pagsaka sa nangatakdan sa COVID-19.
Nahunong ang misa sa Basilica Minore del Santo Niño Pilgrim Center. Ug gibalhin ngadto sa usa ka gamayng lawak-alampoanan aron adto na lang intawon ang kaparian magmisa. Ug pinaagi sa mainstream media on line mass na lang sila makita. Gikaguol sa mga debotos ug magtutuo ang pagkanselar sa mga dagkong kalihokan alang sa Fiesta Senior. Ilabi na gyod sa linawas misa alang sa publiko ug halad-Sinulog atubangan sa basilica.
Sanglit sagad kanila, may iyaiyang kasinatiang ikaistorya bahin sa mga milagrong nadawat gikan sa Balaang Bata human diha sa ilang hugot pag-ampo-pangilaba panahon sa misa-nobena, kon unsay ilang gipangayo, kini gihatag.
Rason, nganong bisan pa sa gikahadlokang COVID-19 ug sa mga istriktong health protocols, mga debotos, kinsa nahatagag mga milagro’g grasya ni Senior Santo Niño, modumdom gyod pagtambong sa mga misa-nobena, mopamisa ug kinasingkasing mo-Sinulog atubangan sa simbahan agig halad-pasalamat sa nagkalainlaing kaayohang nadawat. Si Cebu Gov. Gwen Garcia, kinsa mihimo kanunay sa Balaang Bata nga iyang gabayan sa inadlaw niyang pagpanikaysikay ug pagpangalagad sa katawhan, hasta kapila na usab makatilaw og abundang grasya gikan Kaniya. Aniay mga pipila niini:
Ning iyang pagpanimon sa Kapitolyo, wala lang mahimong kinadataon sa tanang probinsiya sa Pilipinas ang atong Kapitlyo karon. Nalimpiyohan pa gyod ang iyang ngalan ug bansagon sa ilang pamilya nga kanhi gihugawhugawan sa mga dagkong kasong gidam-ok ngadto kaniya. Kini human gibasura sa Office of the Ombudsman ang tanang criminal charges nga gisang-at batok kaniya.
Busa, agig halad-pasalamat, gikanselar man tuod ang Sinulog Festival 2021 tungod sa giatubang tang pandemiya, maisogong nangitag paagi si Gob. Gwen nga sama sa miaging tuig, makasayaw gihapon siyag Sinulog. Bisag kutob na lang sa nataran sa Kapitolyo uban sa iyang unom lamang ka bak-ap.
Ug bisan sa iyang pag-Sinulog ning adlaw sa Enero 17, manggawas man tuod ang hait nga sungay sa mga kritikong mosaway kaniya, bisag gamay wala siya batiag kahadlok. Kay mas isog kining giandam niyang kinasingkasing halad-pasalamat alang kang Senior Santo Niño. Busa, walay makalupig ug makapugong niini.