Sukwahi sa naandan

Lahi sa naandang kagahob ug kasadya matagpangilin sa Balaang Bata sa nanlabay’ng katuigan, mingaw ug hamugaway ang kadalanan sa dakbayan sa Sugbo karong adlawa.

Wala na ang naandang Sinulog Grand Parade karong adlawa nga dugokon sa liboan ka mga lokal ug langyaw nga mga turista.

Wala say mapaabot nga mga selebrasyon diha sa kadalanan karong gabii sukwahi sa nangaging katuigan.

Dili lang ang kalihukang kultural maoy nahanaw atol sa kapistahan ni Senyor Santo Niño kon dili lakip ang mga relihiyosong kalihukan.

Wala mahuman ang pagpahigayon sa linawas nga pagtambong sa mga misa novena diha sa Basilica.

Wala sab mahitabo ang naandan unta nga traslacion sa mga imahin sa Santo Niño ug sa Birhen sa Guadalupe paingon sa Mandaue ug Lapu-Lapu ug ang fluvial procession.

Bisan ang tradisyonal nga solemn procession atol sa bisperas sa pangilin wala matigayon.

Ang mga deboto sa Santo Niño nakontento nalang sa pagtambong sa mga misa gamit ang ilang mga computer ug smart phones. Unsaon virtual man ang tanang kalihukan.

Kining tanang kausaban sa atong kinabuhi mugna sa mananakod ug makamatay nga kagaw sa COVID.

Apan luyo niining maong mga kausaban ug sa paghikaw kanato sa naandan tang gimbuhaton panahon sa Sinulog, angayan pa gihapon kitang magpasalamat.

Swerte pa gihapon ta nga igo lang natugaw ang naandan ta nga mga kalihokan kun itandi sa uban nga bisan sa kalisud ug kapiligro padayong nakigbugno alang sa inadlaw-adlaw nilang panginabuhi.

Kun naguol ka nga way Sinulog party nga mahitabo karong adlawa, unsa kahay gibati sa mga gagmay’ng mga tindero ug tindera nga nangindahay unta nga makatigom karong adlawa alang sa umabot nilang mga panginahanglan?

Luoy intawn ang mga street vendors nga naglantaw unta sa arang-arang nga kita panahon sa Sinulog.

Apan tungod sa hulga sa COVID sila maoy mas labaw’ng naapektohan niining pagkanselar sa mga kalihokan sa Sinulog.

Show comments