Daghang Pilato sa gobiyerno

Sa gipahigayon nga hearing sa Senado, mipadayag si Sec. Carlito Galvez, Jr., ang gitudlo nga vaccine czar, nga andam siya’ng mosapupo sa bisan unsa pagsaway ug pagbasol kon ugaling adunay dili maayong sangputanan ang programa sa pagpamakuna batok COVID-19 sa nasud.  Isip maoy gitahasan, dili na angay isulti ni Galvez kon kinsay basolon kon may kapalpakan.  Apan ang kasinatian nagtug-an kanato nga kon adunay bulilyaso, tanan’g gitahasan manghunaw daw Poncio Pilato.  Karaang kansyon!

Ayuda alang sa mabakunahan

Atol usab sa maong hearing, mihangyo si DOH Sec. Duque sa mga senador nga ilakip sa giproponer nga Bayanihan 3 ang probisyon nga maghatag og “compensation” ngadto sa mga mabakunahan nga makasinati ug dili maayong epekto sa bakuna batok COVID-19.  Inay pasaligan ang katawhan nga luwas ang bakuna, hadlokon na man hinoon.  Mora’g mosamot kagamay ang magpabakuna niining kalakiha. Scare tactics o panagang daan, o laing paagi sa pangwarta? Hinoon, masulbad na ang suliran sa “prioritization” nga giatubang sa gobyerno. Fezteleern!

Swerte nga dimalas

Duha ka langyaw nga taga-Africa ang na-stranded sa NAIA sukad pa niadtong Abril 2019 hangtud nga naabtan sa pagkuyanap sa coronavirus. Nailhan ang duha nga si Emmanuel Josiah Johnson, taga Liberia, ug si Alain Njogho Acha, taga Camerron.

Kakulang sa clearance ang hinungdan sa ilang pagkatanggong. Gisagubang sa PAL ang ilang pagkaon ug akomodasyon. Swerte nga dimalas ang kahimtang sa duha:  Swerte kay dako sila’g pinuy-anan ug libre ang pagkaon; apan Dimalas usab kay daw binilanggo ug walay kaseguroan ang ilang kahimtang.  Faeetz!

Bahandi luyo sa septic tank

Tulo ka tawo ang gidapit sa Lapu-lapu City Police Station 4 aron paghatag katin-awan sa pasangil nga mipahigayon sila og “illegal treasure hunting” ginamit ang takuban nga magbuhat og septic tank.  Sa dihang midako na pag-ayo ang lungag, nagduda na ang mga awtoridad.

Alang gyud unta sa septic tank ang ilang gikalot apan sa dihang nakakaplag sila’g ilhanan sa bahandi, ila kining gipadak-an ug gipaladman, dala ang pamasin. Sa mga nagkalot, haum kanila ang giingon ni Leonardo da Vinci nga, “Kadto’ng buot maadunahan sa usa lang ka adlaw, mabitay hinoon sa tibuok nga tuig”.  Saoonz!

Padata-datahan nga imahe

Nakasinati og dako’ng pagkunhod sa halin karon ang mge Sto Niño Vendors tungod kuno sa pagpatuman sa lagda sa social distancing.  Suliran nila karon ang pagbayad sa ilang giutang nga puhunan ug sa abangan sa pwesto.  Sa pagkanselar sa mga kalihukan nga nagpadayag sa atong pagtoo, napagan usab ang ilang negosyo.

Nakapahinumdum kanako sa panghitabo kanhi sa ako’ng opisina diin adunay misulod nga nagbitbit og imahe sa Sto. Niño dayon hanyag sa mga trabahante pag-ingon, “Sto. Niño mo diha Day, padata-datahan”.  Madahaaan!

Pit Senyor kanatong tanan!!!