Salamat sa Ginoo ug salamat sa mga paring Agustino nga nihatag nako og kahigayonan nga makamisa mismo sulod sa pilgrim center sa basilica. Dugay ko na baya kining gidamgo ug salamat sa Senyor nga gihatagan ko og kahigayonan sa ingon.
Apan subo lang palandungon kay sa padulong nakong pauli sa habagatan mao na lay nadunggan nako nga nipahigayon og usa ka press conference ang mga kapariang Agustino nga nagpahibalo nga kanselado na ang mga misa nga saulogon physically agig pagsanong sa kamandoan sa IATF sa kahadlok nga mosaka og samot ang kaso sa COVID-19 humn sa Piyesta Senyor. Tuod man sugod sa pagtagik ning maong panahom balik virtual na pud ang pagsaulog. Ingon ini ang kahimtang karong mga panahona. Lisud man tuod apan maoy tinuod.
Ning maong hitabo, daw ang mogawas nga basolon mao ang mga parokya dinhi sa Sugbo ug sa tibuok Pilipinas gumikan sa pagpahigayon og mga Misa de Gallo niadtong nilabay nga pasko. Ug daw makapanimaho kita nga dunay dakong posibildad nga sirad-an pagbalik ang mga balay alampoanan ning maong kahimtanga karon.
Apan ang pangutana, ang simbahan lang ba ang basulon? Ang tubag dili tungod ning mosunod nga mga rason:
1. Ang mga parokya naningkamot baya nga mosunod sa mga protocols ingon man sab ang mga parokyano. Daghan ang nagpakabana.
2. Dunay mga gahi gyud og ulo. Daghan ang nihimo og mga ginagmay nga mga parties niadtong Pasko ug tapok tapok nga maoy hinungdan kun nganong nibalik og saka ang kaso. Hinuon gipaabot man gyud nato nga mosaka gihapon kining maong kaso sa COVID-19 kay bisan unsaon nato og pugong daghang mga tawo ang mga gahi gihapon og ulo.
3.Ang simbahanan dili nato pagatawgon nga mga superspreader sa virus. Kay sa gikaingon ko na naningkamot nga makig-alayon sa kamandoan sa IATF. Sama sa ubang mga essential services may matampo gihapon siya aron makatabang sa mga nagkinahanglan sa iyang panon.
4. Kun paundayonan kining sayop nga panlantaw mamahimong mahatagan og kahigayonan ang mga atheistic ug humanistic nga mga tawo sa pagpaundayon sa ilang gibati apil na niini ang pag brainwash sa kadaghanan nga dili na diay mahinungdanon ang pagsulod sa mga balay alampoanan ning panahon sa pandemiya kay lagi mas luwas kun magpuyo ka lang.
Mahinungdanong kabahin sa atong kinabuhi ang mahal nga Senyor. Apan ning panahon sa dakong kalisdanan nahimong limitado kaayo ang atong mga lihok. Unta bisan pa man sa maong kahagip-ot padayon kitang mituo nga anaa gihapon ang bangaw human sa dag-om.
Viva Pit Senyor Gihapon! Bul-og sa gugma ug paglaum ang atong dad-on dili ang bul-og sa kawalay kapingnan ug depresyon.