^

Giluwas kong Santo Niño

RENBOR PATROL - Rene U. Borromeo (Banat) - January 16, 2021 - 12:00am

Tangkod na nga 26 ka tuig gikan sa pagluwas ni Santo Niño kanako gikan sa kamatayon.

Hilabihan kangilo nga hunahunaon kon maligsan ka og bug-at kaayong sakyanan, nga nagguyod og trailer.

Bisan sa kadugay na sa maong hitabo, apan nagpabilin kining lab-as sa akong panumdoman.

Ang hugot ko nga pagtoo kang Santo Niño, maoy rason nga iya ko nga gimilagrohan ug gihimong gaan ang trak nga miligis kanako.

* * *

Uwan-uwan kadto, mga alas 10:15 sa buntag, diha nga naligsan ko sa prime mover didto sa national highway sa Sitio Bakhaw, Barangay Catmon-daan, Catmon kaniadtong Hunyo 25, 1995.

Kada Martes, atol sa akong day-off, magprograma ko sa Radio DYCM didto sa Bogo nga lungsod pa niadtong higayona.

Inig ka ugma, mobalik ko dinhi sa siyudad sakay sa akong motorsiklo. Miyerkules kadto sa buntag atol sa pagkahitabo.

Tungod sa kadanglog sa karsada, nagbabag-babag ang sakyanan nga nagguyod og trailer kay ang danghag nga driver ug helper, wa mokonektar sa brake sa trailer ngadto sa prime mover.

Mao nga inig-brake sa driver, momenor ang dagan sa sakyanan apan iduot kini sa trailer kay dili man mo-brake ang iyang ligid.

Tungod niini, magbabag-babag ang dagan sa trailer, ug ako nga nagsakay og motorsiklo nga gikasugat sa prime mover, gidasmagan ug naligsan.

Pwerte nakong singgit “Santo Niño tabangi ko!” diha nga nagpaingon na kanako ang truck, apan naligsan gyud ko sa tuo nako nga paa.

Ang bag-o pa nako nga karsones nga gisul-ob niadtong higayona, nagisi ang dapit sa paa ug naporma ang gisi og “L.”

Hangtud karon, gitipigan pa nako ang karsones nga gisul-ob ko atol sa akong pagka-aksidente ug maoy buhing handumanan sa milagro kanako ni Santo Niño. Wa mabali ang akong bukog sa paa bisan og gilatayan kini sa ligid. Gamay’ng pangos ra ang akong nahiagoman, apan nabungkag ang akong motor nga napasok ilawom sa makina sa prime mover.

* * *

Kaniadtong 1981, gihatagan ko og imahen ni Santo Niño, ug sulod sa 14 ka tuig, ako kining hagkan inig dayon nakong lakaw, ug hagkan pag-usab kon mabalik na ko sa balay.

Human ko giluwas ni Santo Niño, misamot ang akong pagyukbo kaniya ug miila sa iyang pagka gamhanan.

Niadtong 2014, may mihatag na usab kanako og bronze image sa Santo Niño, ug kanunay ko na kini nga gidaladala panahon nga molakaw ko.

Siya maoy akong magbalantay ug giisip nga suod nga higala. Panahon sa akong kalisdanan, kanunay ko niya nga gitabangan.

Kamo, himoa usab nga inyong higala si Santo Niño. Viva Pit Senyor!

SANTO NIñO
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with