EDITORYAL - Travel papers

Dunay nasakpang taga laing lugar nga mianhi sa Sugbu pinaagi sa Mactan Cebu International Airport nga nigamit og pekeng acceptance permit.

Matud pa, usa ka Chinese national ug unom ka Pilipinong kauban ang gidakop sa mga otoridad.

Mismo si Mayor Junard Chan nga nakakita sa dokumentong miingon nga gipeke ang iyang pirma.

Gipeke o kuwang ra sa “countersign’ apan kaning ingon niini nga sistema humok ra kaayong abusaran.

Ang mga biyahedor gikinahanglang maglukat og mga dokumento aron sila makabiyahe padulong sa laing probinsiya

Apil sa kinahanglang mopresentar niini ang mga trabahante. Usa sa mga dokumento mao kining travel permit, ug acceptance permit.

Kining acceptance permit ipresentar sa biyahedor ngadto sa mga pantalan o tugpahanan nga magpamatuod nga may pagtugot ang otoridad sa lugar nga ilang giadto sa ilang pagabot.

Apan kinahanglang klarohon sa gobiyerno, kinsa man gyud diay ang angay molukat niini?

Ang biyahedor o  mahimo rang laing tawo o pribadong ahensiya maoy mosasikaso sa travel papers.

Kung duna, accredited ba sila ni kinsa o unsa nga ahensiya sa gobiyermo?

Kung wa, nganong naa may mga nangadakpan nga nangangkong laing tawo ang naghikay sa ilang mga papel bugti sa bayad?

Kun ang travel papers gipeke gani, wala pa kaha sab ni nahitabo sa mga swab test results ug medical clearance nga nagpakitang negatibo sa coronavirus ang tawong nigamit niini ilabi na sa panarbaho?

Maayo tingaling lilion kini sa mga otoridad, kay basin mosirit pagsaka ang mga kaso tungod aning mga pekeng travel documents ug mga pekeng medical clearances.