God is everywhere

Enero 11, 2021.  Alas 5:40 sa hapon. Gikan ko mipalit og mga tambal. Maoy misugat sa akong pagmaneho ang pundok sa katawhan nga nagpunsisok sa dalan Escario, duol sa may taytayan, diin likod nagdasok ang gagmay’ng kabalayang gisalipdan sa mga nagtuybong balay-patigayon, ginagmay ug dinagko.

Paghitungod na nako, nakita ko ang dakong telon nga nagpasalidag misa-nobena live streaming alang sa kapistahan ni Senior Santo Niño nga nanukad didto sa Pilgrim Center, Basilica Minore del Santo Niño ning dakbayan sa Sugbo.

Kon unsa kadaghan ang magpunsisok matag higayon nga may payit si Pambansang Kamao Manny Pacquiao ibabaw sa ring nga ipasundayag pinaagi sa pay-per-view, halos susama gayod ang maong situwasiyon.

Ang deperensiya lamang mao: dili kabanha sa pag-inabiba ang mabati. Dili ‘Payit, Manny! Payit, Manny!’, kondili, ang pag-awit sa Bato Balani sa Gugma ug ang limbatianong siyagit: “Pit Senyor! Pit Senyor! Kaloy-i kami!”

Ang kahugot sa pagtuo, diin ang kinasingkasing pag-ampo-pangilaba ngadto sa milagrosong Senior Santo Niño mao ray makabuntog ni COVID-19, maoy dakong rason nganong dili gyod mapugngan ang pagpunsisok sa mga magtutuo.

Apan angay hinumdoman. God is everywhere. Bisan asa kita makig-istorya-ampo Kaniya, mamati Siya ug mohatag unsay atong gipangayo. Kana kon ang gipangayo, makaayo nato.

Ilabi na, kon kita kaantigo maminaw sa mga tawong gipadala ug gihimo Niyang instrumento nga isangyaw unsay buhaton aron kita mapanalipdan ning giatubang tang katalagman. Ang Inter-Agency Task Force (IATF) ug ang kaparian sa Basilica Minore del Santo Niño, usa sila sa mga gipadala ug gipili.

Kon ang kaparian sa basilica nakahukom nga ang nasugdang misa-nobena sa publiko himoon na lang virtual sugod Enero 12, gikan sa Ginoo kining sugoa. Ilang gituman ug gipatuman. Busa, angay pod natong tumanon.

Hinumdomi.  Si Hesus miingon sa mga tinun-an: “Kon mag-ampo mo, adto sa lawak. Takpi ang pultahan ug pag-ampo sa Amahan nga nag-uban ninyo sa tago. Ang Amahan nga nakakita sa tago, moganti ninyo. (Mateo 6: 6).

Kini tin-aw kaayong mipahayag nga ning panahon sa pandemiya, mahimo rang dili ta motambong sa misa sulod sa simbahan. Kay mas gantihan-paminawon pa gani sa Ginoo kadtong mag-ampong mag-inusara sulod sa lawak.

Yes, God is everywhere. And we can pray anywhere.