Way tay bawot

Ang Megawide, usa ka pribadong korporasyon, mao diay ang tugyanan sa kagamhanan sa Dakbayan sa Sugbo pag-modernize sa atong Carbon Market.

Una, nindot kaayo nga kalamboan kay ma-modernize na ang atong merkado sa Carbon nga dugay na kaayong wa gyud mamaayo sa pag-atiman.

Apan matud ni Erwin Gok-ong, ang chairman sa Cebu Market Vendors Cooperative (CEMVEDCO), nga mabentahaan ang siyudad sa mga ipatuman unya nga pamaagi.

Ngano man? Kay ang Oversight Committee nga maoy maghimo og mga pamaagi sa pagdumala sa Carbon Market unya, gilangkoban sa pito ka tawo, ug tulo ra ang sa siudad.

Bisan og ingon niini ang sitwasyon, giuyonan kini sa mga sakop sa Cebu City Council ug miawhag sila ni Mayor Edgardo Labella nga uyonan ang Joint Venture Contract tali sa Megawide.

Dunay mga konsehal nga kaalyado sa Bando Osmeña Pundok-Kauswagan (BOPK) nga mikuwestyon niini, apan wa sila makatingog diha nga giingnan nga ingon usab niini ang gihimo sa administrasyon ni Tomas Osmeña dihang siya pa ang mayor.

Ang Oversight Committee kuno sa Universal Hotel and Restaurant Incorporated (UHRI) nga maoy nag-develop sa Kawit Island nga sakop na sa SRP, ingon usab niini ang sistema.

Mao sab diay. Sa ato pa, si Osmeña mitugot usab diay nga mabentahaan ang siyudad sa kasabotan sa pagdumala sa higanteng negosyo sa Kawit Island.

Kon ingon niini, mas maayo pa og wa na lay representasyon ang siyudad kay tabla ra man sila diha og mga “tawo-tawo” sa humayan.

* * *

Kabahin sa paggamit og bakuna aron ialkontra sa Corona Virus Disease (COVID-19), angay nga ang paliton kadto gyud nga buhat sa kasaligan na nga pharmaceutical laboratory, ug dili ang gikan sa China nga Sinovac.

Samtang maayo usab manghimo og mga tambal ang China, apan niining puntoha nga ang tumong nga santaon mao ang coronavirus, dili kaayo ko mosalig sa China.

Ang nindot nga paliton sa atong kagamhanan kadtong barato ug napamatud-an na nga epektibo, dili kay kita pa nga katawhan maoy eksperimentohan.

Kuyaw man gud kaayo kay kon dunay basi nga “side effect” sa mao nga bakuna, unsa may mahitabo sa atong pamilya? May kasabutan ba nga ang usa ka tawo kon mamatay human nga nabakunahan, atimanon sa gobiyerno ang iyang pamilya?

Dinhi hinuon sa Kabisay-an, base sa gihimong survey, kadaghanan ang dili gyud gusto nga mabakunahan og bakuna nga gihimo sa China.

Tabla ra nga ang China maoy giingong naghimo sa virus, unya adto ra sab gikan kanila ang bakuna? Mora gyud diay ni og negosyo? Sama sa mga computers, dunay motuyo paghimo og virus, unya mamaligya og anti-virus.