Husto’ng way Sinulog

Husto ang disisyon sa Regional Inter-Agency Task Force for the Management of Emerging Infectious Disease (RIATF-MEID) nga dili itugot ang pagpahigayon sa Sinulog karong tuiga nunot sa nagpadayong hulga sa COVID-19.

Haum sab ang sugyot niini nga inay mopahigayon og virtual Sinulog diin ang mga contingent mo-rekord sa ilang pasundayag, ang karaan nalang nga mga performances sa nangaging mga Sinulog maoy ipasundayag atol sa adlaw sa Sinulog.

Sa ingon niini wala gyuy mahitabong physical nga kalihokan nga posibling mamahimong hinungdan sa tinakdanay.

Wala masayop ang RIATF sa pamahayag niini nga bisan og virtual, sigun sa gusto sa Sinulog Foundation, Inc., dili gihapon malikayan ang panagpundok atol sa rehearsal ug sa adlaw sa ilang presentasyon.

Ang pagkapositibo sa usa sa mga participants sa gihimong COVID test igo na nga pahimangno alang sa kadagkuan sa SFI ug ni Bise Mayor Michael Rama nga nangugat gyud nga ihinayon ang Sinulog.

Dili maayong isugal ang panglawas sa mga Sugboanon tungod lang sa kapritso ug personal nga interest sa pipila ka tawo.  Makapahingawa ang pagsulbong sa mga kaso sa COVID dinhi sa dakbayan sa milabay’ng kapin sa semana.

Basi sa talaan sa Department of Health nadoble ang active cases sa dakbayan sulod lang sa usa ka semana.

Gikan sa kapin sa 100 ka active cases pagtapos sa 2020, mikabat na kini og dul-an sa 300 niadtong Biyernes.

Kun dili ta mag-amping kuyaw nga mosulbong pa ang mga kaso nga siguradong makaapeke sa atong ekonomiya.

Wala tingali gusto nato nga mobalik sa sitwasyon nga mapaubos ang dakbayan sa ECQ.

Ang nagpadayong Novena Masses diha sa Basilica Minore Del Santo Niño angayang badlongon sab sa RIATF.

 Makalilisang ang pagdagsa sa mga tawo atol sa unang adlaw sa Novena nga posibling mahimong pabilo sa pagsaka pa og dugang sa mga kaso sa mosunod nga mga adlaw.

Ambot nganong kinahanglan natong ipasundayag ang atong pagtuo? Kun nagtuo ug misalig mo sa Balaang Bata, wala kinahanglana nga makigdasok mo diha sa Basilica aron mag-ampo.

Kun di kapugngan sa mga awtoridad ang pagdagsa sa mga tawo, mas maayo tingali nga hunongon sab ang maong kalihukan. Mamahimong ipadayon ang Novena pinaagi sa live streaming diin ang mga deboto mamahimong motambong gamit ang teknolohiya sa internet.