Pundo batok COVID-19

Gikompirmar sa kadagkoan sa Vicente Sotto Memorial Medical Center nga 18 sa ilang mga staff nga naglakip sa mga doktor ug nurses ang positibo sa COVID-19.

Subay niini, ilang gisirad-an ang operating rooms sa tambalanan sulod sa tulo ka adlaw sukad niadtong petsa Enero 5 hangtud karon, petsa 7, alang sa decontamination.

Sigun sa pahibawo sa VSMMC, didto magsugod ang infection sa operating room dihang usa sa mga nurses ang natakbuyan sa sakit.

Dili na bag-o nga dunay mga health care workers nga mataptan sa sakit sanglit sila maoy anaa sa frontline sa atong pagpakigbatok sa COVID.

Apan ang makapahingawa nga kasayuran mao nga posibling dili gikan sa tambalanan nakuha sa mga nataptan ang kagaw.

Ang pagduda mao nga nakuha nila ang sakit sa ilang lulinghayaw. Ang mga kasaligang tinubdan, uban nila dunay sakop sa pamilya nga nagtrabaho mismo sa tambalanan, miingon nga labihang pagmaya sa mga doktor ug nurses sulod sa mga hotel dinhi sa dakbayan.

Sigun sa akong tinubdan niabot ang dakong pundo alang sa COVID response. Busa isip incentive sa mga doktor ug nurses nga maoy nakig-asdang sa sakit gipapuyo sila sa mga hotel.

Giangkon sab ni sa DOH atol sa ilang press briefing niadtong Martes.

Ang kahugpongan sa mga hotel, resorts ug restaurants (HRRAC) dinhi sa Sugbo miangkon nga ni reserve ang DOH og kapin sa usa ka libo ka kwarto sa nagkadaiyang hotels.

Apan kapin ra sa 900 ang ilang nagamit. Kini tungod kay ang ubang gihatagan niini nipili nga dili lang mogamit sa kwarto ug mopauli sa ilang mga panimalay human sa ilang trabaho.

Tingali angayang ipasabot og tarong sa DOH ug kadagkoan sa VSMMC nganong gigasto sa pagbayad og mga hotel ang pundo alang sa COVID response.

Wala na ba ta magkuwang og test kits, PPE ug uban pa nga importanteng gamit?

Makasubo ang mga pasangil nga giwaldas sa DOH ug VSMMC ang kwarta tungod kay awahi na kaayo ning niabot ug nabalaka silang mabalik sa panudlanan sa kagamhanan kun dili mahurot og gasto sa dili pa matapos ang tuig.

Ang pundo giingong alang unta ni sa panginahanglan sukad niadtong Septembre hangtud sa Disyembre apan tunga-tunga na sa Disyembre niabot.

Nangreklamo sab ang ubang kawani nganong mga doktor ug nurses ray nakapahimulos?

Sama sa mga doktor ug nurses, duna say ubang kawani sa tambalanan nga maisip gihapon nga mga frontliners bisan og ang ilang trabaho dili direktang pag-atiman sa mga pasyente.