Dili angay ahaton

Peligro nga dili na gayud madayon ang proposal mahitungod sa pagpahigayon na sa sunod bulan sa face-to-face classes sa mga lugar sa nasud diin minos ang risgo sa makamatay nga coronavirus disease o COVID-19.

Kaniadtong Sabado, gimando ni Presidente Rodrigo Duterte ngadto sa Department of Education nga iuktaba una ang pagbalik sa physical classes nga unta sugdan na karong Enero.

Kini gumikan sa bag-o nga strain sa coronavirus disease nga nadiskobrehan didto sa Britanya.

Ang maong bag-o nga COVID-19 strain giingong mas grabe ka mananakod kay sa kasamtangang mikatap nga klase sa virus sa kalibotan.

Mikatap na kini gikan sa Britanya ug adunay taho nga nakaabot na kini sa mga kasilinganang nasud sa Malaysia ug Singapore.

Atol sa meeting sa mga opisyal sa Inter-Agency Task Force for the Management of Emerging Infectious Diseases (IATF-EID) ug ubang eksperto, giesplikar ni Duterte nga dili siya makatugot nga mabutang sa alanganin ang kinabuhi sa mga estudiyante.

Atong mahinumdoman nga sa niaging mga bulan, daghang sektor dinhi sa Sugbo ang pabor sa sugyot nga ibalik na ang face-to-face classes sa mga lugar diin libre sa COVID-19 sama sa mga tunghaan sa mga rural areas.

Gani, si Gobernador Gwendolyn Garcia uyon man sa hinayhinay nga pagbalik sa face-to-face classes sa probinsiya sa Sugbo, butang nga gipaboran usab sa mga mayor sa kalungsoran ug sa rehiyonal nga buhatan sa DepEd.

Apan insakto lamang ang desisyon sa Presidente. Sayod kita nga kuyanap pa ang coronavirus bisan asang dapita sa nasud.

Mao nang dili angay nga ahaton pa ang pagbalik sa physical classes. Kay basin unya kun mosulbong na usab ang mga kaso ug samot na hinuon nga malugmok ang nasud.