Kagaw, maro nga kaaway

Nagpadayon ang gubat tali sa mga tawo ug sa kontra nga dili makita nga mao ang coronavirus nga hangtod karon nagsabwag og kadaut.

Medyo nakakita na og kahayag ang katawhan tungod sa pagkakaplag na og bakuna batok sa COVID-19.

Ang bakuna maoy maisip nga gamhanang hinagiban nga gihuptan karon sa katawhan batok sa kagaw nga gikalisangan tungod sa kabangis nga dala niini.

Murag nakaginhawa na ang mga tawo kay abot kamay sa tinagalog pa ang tambal. Gani nakuptan na ug nagamit na gyud sa ubang nasod ang covid vaccine.

Hinuon sa Pilipinas naghuwat pa kita apan malaumon nga sa daling panahon makagamit na kita sa bakuna aron mapanalipdan batok sa kaaway nga dili makita.

Apan murag utokan o mat-an pa sa pinya, matud pa sa uban, ang virus kay dali kaayo kini nangita og pamaagi nga makausab sa ilang maniubra pagsabwag og kadaut sa mga tawo pinaagi sa mutation.

Sama sa salida sa sine apan tinuod kini nga nahitabo karon, unang nadiskobrehan sa United Kingdom ang bag-ong strain sa COVID-19.

Hinuon dili pa maseguro kong mapilde ba kini sa nadiskobrehan nga bakuna karon ug kong unsa kini ka isog.

Kini ang angayan nga pangandaman sa katawhan sa tibuok kalibotan, ang uban mipatuman na og travel ban sa mga tawo gikan sa UK ug ubang mga dapit nga agianan sa mga tawo nga nag gikan sa UK.

Sa tigom nga gipatawag ni Presidente Duterte niadtong Sabado sa gabii gituki og maayo ang pamaagi aron mapugngan ang pagsulod sa bag-ong strain sa virus.

Unta dili pa uwahi ang tanan kay basin mahisama sa pagsugod pa lang sa COVID-19 sa China nga dugay nihimo og lakang ang gobiyerno nga misangpot sa sitwasyon karon.

Apan ang nahitabo sa United Kingdom nga nahitago ang virus mutation dili layo ngamahitabo usab dinhi sa nasud.

Unsaon man nato pagseguro nga ang virus nga anaa na karon sa nasud nag-mutate na usab? Anaa na sa palibot ang virus ug usa sa characteristic niini ang mutation.

Dili lang ang ubang nasud ang bantayan kondili mismo dire sa sulod sa Pilipinas kay basin wala lang kita masayod nga nag-usab na pud o nag-level up na ang kagaw sa atong palibot.

Kumpiyansa na ra ba kaayo ang ubang mga tawo karon nga halos dili na gani motoo nga naay COVID-19, seguro tungod sa frustration  mugna sa krisis nga nasinatian.

Apan dili angayan luagan ang bakos sa pag-amping kay wala kita masayod kong unsay mahitabo sa umaabot ug asa kutob ang kadaut nga mamugna sa kagaw ngadto sa katawhan.

Nag-mutate man ang virus apan mas gamhanan ang Ginoo nga mogiya sa tawo kong unsay angayan himoon aron mapilde ang kaaway kay seguradong dili Siya motugot nga mapuril ang Iyang mga nilalang.