^

Hinungdan sa krisis

BALITAHOM - Atty. Jose Marie N. Poblete (Banat) - December 27, 2020 - 12:00am

Gihulagway sa daghang netizens nga “theatrics” o “salida sa bantawan” lang ang pagpangunay ni Health Secretary Duque pag-imponer sa health protocols didto sa usa ka mall sa Taguig City diin nakita ang kalihim nga migamit sa metrosan pagsukod-sukod sa gilay-on sa matag tawo. Taktika sa bulay-og nga “lubogon ang tubig sa lim-aw aron ingnon nga kini lawom”. Gani, bisan kon magtungok ra ang mga bulay-og, makahimo gihapon sila og kada-ot. Husto si Albert Einstein sa iyang obserbasyon nga, “Ang pagkabulay-og (sa atong mga lider) maoy tinuod nga krisis”. Tabang mga langit!

Dali ra’ng mokuyanap

Kusganon nga mipasidaan ang mga senador batok sa pagpamalit sa bakuna’ng Sinovac sa China tungod kay gawas nga mahal kini itandi sa uban, giingon usab nga 50% lamang ang ka-epektibo niini.  Ang bakuna sa Pfizer giingon nga mas barato ug adunay efficacy rate nga 95%.  Makalibog ug makaduda ang baruganan sa atong kagamhanan sa pagpabor sa bakuna’ng Sinovac.  Wala kaha kita maigo sa panultihon nga “Ang ‘pag-Pangulo pinaagi sa sumbanan’ maoy labing mananakod nga matang sa pag-Pangulo. Maoy hinungdan nga dali ra’ng mokuyanap ang kurapsyon”?  Fezteleern!

Nalangan si Santa Claus

Mipahibalo U.S. Postal Service nga adunay kalangay sa paghatud sa mga sulat ug ubang mga padala tungod sa nasinati nila nga pag-uswag sa gidaghanon sa mga nagpadala og mga pinaskohan.  Dugang pa, kulang usab ang ilang empleyado tungod sa pandemiya.  Dinhi sa Pilipinas, dili ang kalangan sa Post Office ang nabatyagan kon dili ang labihan ka estrikto nga lagda sa kuwarantinas.  Nalangan kuno si Santa Claus pagpanghatud sa mga gasa kay sa matag lungsod nga iyang adtoan, ipaubos pa man siya sa 14 ka adlaw nga kwarantinas.  Pagkatoytoy!

Pabilin pa ang COVID-19

Segun sa DBM, nakapagawas na ang nasudnong kagamhanan og mokabat P500 bilyones karong tuiga alang sa pagbatok sa COVID-19 ngadto sa nagkalainlaing ahensya.  Dili tiaw ang maong kantidad diin laraw pa gani sa kagamhanan nga kini pagadugangan.  Apan sa kadako na sa nagasto, daw wala man gihapo’y alibyo ang pagkinabuhi sa katawhan.  Ni’ng kahimtanga, daw nadungog nako ang tingog sa magsisibya sa radio nga nagkanayon, “Balita, Balita! Ang kwarta sa gobyerno, nahurot na; apan ang COVID, nagpabilin pa”. Madahaan!

Way hulip ang pagka-kugihan

Sa iyang paskohanong mensahe, gidayeg ni Presidente Duterte ang kaisog sa katawhang Pilipinhon pagsungasong sa mga kakulian ug katalagman nga nasugatan karong tuiga.  Gidasig usab kita nga magmala-umon kay aduna na’y nabatyagan nga “maanindot nga mga adlaw” sa umaabot.  Taliwala ni’ng mga pagdasig, angayan nato’ng hinumduman nga walay hulip ang pagkamakugihon kon buot nato kab-oton ang tingusbawan.  Labaw na’ng dili magtuo-tuo nianang mga mananag-an nga mangatik ginamit ang ilang “bolang kristal” atol sa bag-ong tuig. Estoryaheee!

HEALTH PROTOCOLS
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with