^

Padayon kitang nagpailad

BALITAHOM - Atty. Jose Marie N. Poblete (Banat) - December 24, 2020 - 12:00am

Mipasalig ang Cebu City Police Office nga dili mahitabo dinhi sa dakbayan sa Sugbo ang nahitabo didto sa Tarlac nga pagpamatay diin polis ang naghimo sa salaod. Ang maong pasalig giluwatan Police Lt. Col. Wilbert Padilla tungod kay aduna kuno’y programa ang CPPO nga nag-atiman sa mental ug spirituwal nga aspeto sa ilang mga sakop.  Sa kadaghan sa saad nga ilang gipakyas, angayan na unta’ng kasilagan ang kapolisan sa katawhan.  Apan mas angayan kita’ng masilag sa atong kaugalingon tungod kay padayon gihapon kita’ng mitoo ug misalig sa ilang bakak.  Promise pa more!

Wala na’y pulos

Mipahibalo ang LTO-7 nga miabot na gayod ang 18,879 ka mga plaka alang sa mga motorsiklo nga narehistro kaniadto pa’ng tuig 2018.  Adunay kausaban ang gidak-on sa bag-ong mga plaka. Apan wala ikahimuot sa akong silingan ang maong kalambuan. Tungod sa kadugay, wala na’y kapuslanan alang kaniya ang plaka kay ang usa niya ka motor na-embargo na sa iyang giutangan ug ang usa, nadakpan ug na-impound sa CCTO.  Unsaon pa kuno ang kumpay nga patay na man ang kabayo? Matud pa sa taga-Salot, “Walay Pulos”.  Saoonz!

Maunay kita sa tari

Matud pa sa detenido nga senador nga si Leila De Lima, walay kredibilidad si Presidente Durerte nga mopadayag sa iyang kayugot sa gibuhat sa polis nga pagpatay sa inahan ug anak didto sa Tarlac. Alang kang De Lima, ang panghitabo bunga sa makahilo nga kultura sa pagpamatay nga gitisok sa Presidente.  Dili ikahibulong ang mga pasangil sa Senador kay lage ginaingon man nga,”90% sa mga politiko mohingalan og dautan ngadto sa nahibilin’g 10%.” Apan may panultihon baya usab nga nagkanayon, “Kon buotan ang katawhan, dili mahimong dautan ang kagamhanan”.  Ma-unay ra gihapon ‘ta sa tari!

Kanta na la’g ‘granada’

Mirekomendar si Presidente Duterte nga butangan ang mga pabuto og hustong mga pahibalo o “proper labelling” aron makapanubag unya ang tigbuhatan niini sa higayon nga mokagar ang ilang produkto nga mahinong makaangol sa katawhan.  Kawang lang ang panawagan sa kagamhanan kay dili man kapugngan ang katawhan.  Kon aduna pa’y baligya’ng pabuto, aduna pa gayo’y magpabuto.  Tungod ba kaha sa tradisyon o gahi lang gyud og alimpatakan ang Pilipino?  Aron walay kadaut, maypa mokanta na lang kita sa awit ni Yoyoy Villame nga giulohan og “GRANADA”. Na hala, birit na!

Personal greetings!

Niining tuig 2020, daghan kanato nakasinati’g kalisod ug kahingawa tungod sa pandemic nga dala sa COVID-19. Apan bisan pa, angayan gihapon kita’ng magmapasalamaton ug magma-inampoon ngadto sa Labaw’ng Makagagahum ug molaum ug mosalig gihapon kita nga maluwas ni’ng maong gumonhap. Sa tanan nakong kaila, kahigalaan, kaparyentihan ug labi na gayod sa nga nagsunod ni’ng akong lindog, akong mainito’ng pagtimbaya kaninyo sa usa ka “Malipayong Pasko ug Bulahang Bag-ong Tuig 2021.”

CPPO
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with