_banat
^

Malipayong Pasko

SAKSAK SINAGOL - Lucky P. Malicay (Banat) - December 23, 2020 - 12:00am

Duha ka adlaw na lang moabot na gayud ang Pasko ug magsadya na usab ang katawhang Kristiyano sa tibuok kalibotan sa dakong selebrasyon pahinungod sa pagkatawo ni Kristo Hesus, ang bugtong natong manunubos

Apan lahi ang selebrasyon nga atong matagamtaman karong tuiga.

Lahi sa atong naandang selebrasyon nga sadya kaayo ang atong Pasko. Gani, ang Pasko maoy usa sa labing importanteng adlaw kanatong mga Kristiyano.

Karong tuiga, hilabihan ka dulom ang selebrasyon nato sa Pasko.

Kini gumikan niining coronavirus disease pandemic nga padayong mihasi sa kalibotan. Ug wala pa matino kun kanus-a kini molurang ug mopalayo.

Matag adlaw, padayong nagsaka ang mga kaso sa COVID-19 sa bisan asang suok sa kalibotan.

Ang maong balatian mitakboy na sa subra sa 77 milyones, kadaghanan didto sa Estados Unidos, Europa ug sa South America.

Sa maong gidaghanon, subra sa 1.7 milyones ka tawo ang nawad-an gayud sa ilang kinabuhi, ilabina didto sa Amerika, India, Brazil, Mexico, Italy, United Kingdom, France, Russia, Iran, Spain, Argentina, Colombia ug Pero.

Tungod lagi kay wala pay nadiskobrehan nga tambal batok sa maong seryosong balatian, lisod nga maputol ang tulin nga pagsulbong sa mga kaso niini.

Hinuon aduna nay bakuna nga gi-distribute isip pangontra sa coronavirus disease.

Didto sa Amerika ug ubang adunahang nasud sa Europa, nagsugod na sa pagpamakuna ang ilang mga kagamhanan.

Medical personnel kinsa maoy nag-unang mga sundalo batok sa COVID-19 maoy una nga benepisaryo sa maong pagpamakuna.

Ambot kanus-a gayud magsugod ang pagpakuna dinhi sa Pilipinas.

Ning kasamtangang panahon, busy pa sa panaglalis ang atong mga opisyal sa gobiyerno mahitungod sa negosasyon sa pagpalit og bakuna.

Kini bisan pa man sa mga saad sa nasyonal nga kagamhanan nga sugdan na sunod tuig ang pagpamalit og bakuna ug nga target niini nga hangtud sa 70 milyones ka mga Pilipino ang mabakunahan sulod sa tulo ka tuig.

Sa laing bahin, hilabihan ka dulom ang Pasko alang kanatong mga Pilipino.

Daghang kompanya ang nanira tungod sa dakong alkanse ug milyones ka mga trabahante ang nakulban sa kaldero gumikan sa kabangis sa coronavirus disease.

Apan bisan pa man niini, pabilin kitang positibo nga atong mabuntog gayud kining dili makita nga kaaway.

Ingon niini gayud kitang mga Pilipino, pabiling positibo sa kinabuhi taliwala sa mga trahedya. Malipayong Pasko kanatong tanan.

PASKO
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with